Предпринимательлеге себеплик этиуден иги хайыр тюшеди

«Гитче эмда орта предпринимательство, сора энчи предпринимательство башламчылыкъгъа себеплик этиу» миллет проект бардырылгъан кезиуде 2019 жылдан башлап былтыргъа дери Къабарты-Малкъарда гитче эмда орта предпринимательствогъа эм аз ёлчемли кредитле бериу Фонд быллай ахча излегенлени 631,2 миллион сом багъасына онгдургъанды. Аны бла битеу да 959 займ берилгенди, дегендиле республиканы Экономиканы айнытыу министерствосунда.

Болушлукъ кёргенлени санында эл мюлкде, аш-азыкъла чыгъарыуда, сора жарашдырыучу эмда социал бёлюмледе къармашхан, оптовый эмда розница сатыу-алыу бла кюрешген, жумушла бла жалчытхан предпринимательле бардыла. Аланы ичинде энди ишлеп башлагъанланы саны 230 болады.

Ала ол ахчаны ишлерине, сырьё, материалла, оборудование сатып алыргъа, объектлерин жангыртыугъа къоратхандыла. Бу болушлукъну хайырындан гитче эмда орта предпринимательство бёлюм иги айнытыу кёргюзтгенди: миллет проект бардырылгъан алты жылны ичинде аланы саны, 22,3 процент къошуп, былтыр 22,6 мингнге жетгенди.

Быйыл биринчи январьгъа республикада кеслери иш къурап къармашхан инсанланы саны 81,5 минг болгъанды. Бу кёрюмдю нечик ёсгенин жаланда бир шарт кёргюзтеди: 2020 жылда КъМР-де аллай 1,5 минг адам бар эди.
Предпринимательлени эмда кеслери иш къурап къармашханланы саны ёсгени бла бирге ала тёлеген налогла да кёпден-кёп бола барадыла. Былтыр битеу да 2,4 миллиард сом жыйылгъан эди экилеринден да. Сёз ючюн, 2019 жылда ол жаланда 1 миллиард сом болгъанды.

Бизнесни кредитле бла онгдургъан системаны айнытыу – «Къыйматлы эм конкуренциягъа чыдамлы экономика» миллет проектни чеклеринде тамамланырыкъ баш борчладан бириди, ол кеси да 2025-2030 жыллада бардырыллыкъды.