Аскерчилеге – ыспас, бюсюреу, аналагъа – гюлле

Акъ-Сууну 15-чи номерли мектебинде «Хорламны ауазы» деген ат бла къууанчлы иш бардырылгъанды. Аны бла бу окъуу юйде Ата журтну къоруулаучусуну жылы ачылгъанды. Къууанчлы ингирни эл администрация бла школ бирге къурап ётдюргендиле. 

Байрамгъа ФСБ-ны запасдагъы генерал-лейтенанты Аттоланы Борис, Урушну, урунууну, право низамны сакълаучу органланы ветеранларыны Нальчик шахар советини таматасы Абдуллаланы Мустафа, КъМР-ни  Парламентини депутаты Байсыланы Темиржан, шахар администрацияны бёлюмюню таматасы Гергъокъланы Джамболат, элни администрациясыны башчысы Гергъокъланы Тимур, Акъ-Сууну тамата тёлюсюню башчысы  Османланы Хыйса да чакъырылгъан эдиле. Андан тышында да ары эллиле да келгендиле. Залгъа энчи аскер операциягъа къатышып къайтхан жашла киргенлеринде уа, жыйылгъанла, ёрге туруп, алагъа къарсла бла тюбегендиле. Бу элден Ата журтубузну сейирлерин къоруулау СВО-гъа 50 жаш къатышхандыла. Кёбюсю бюгюн да къуллукъларын бардырадыла. 

Байрамгъа келгенлеге ыспас сёзлени къызгъанмай Гергъокъланы Тимур бла окъуу юйню директору Бачиланы Анжела сёлешгендиле. Ала энчи аскер операциягъа къатышып къайтханлагъа эм аланы ата-аналарына жюрек ыразылыкъларын билдиргендиле. 

- Аскерчи жашларыбыз Ата журтну жалынчакъсызлыгъы ючюн къазауатда чынтты патриотла болгъанларын кёргюзтедиле, борчларын бет жарыкълы толтура, махтаулу тёлюлени тёрелерин андан ары бардырадыла. Ала ёсюп келген тёлюге Ата журтха кертичиликни бла батырлыкъны юлгюсюн кёргюзтедиле», - деп чертгенди Гергъокъ улу.

Абдуллаланы Мустафа уа быллай аламат байрамны къурагъанлары ючюн окъуу юйню келечилерине ыразылыгъын билдиргенди.  Совет Союзну, Россейни къадарларында да Ата журтну къоруулаучуну жылы биринчи кере тохташдырылгъанын эсгертгенди ол. Уллу Ата журт урушну ветеранларындан битеу республикада да жаланда алты адам къалгъанын айтып: «Аланы сиз, СВО-гъа къатышхан жашла, алышдыргъансыз. Сизни  юсюгюзден китапла, назмула да жазыллыкъларына, кинола алынырыкъларына  ийнанама. Аллыгъызда баш урама»,- дегенди. 

Ызы бла экранда СВО-гъа къатышхан эмда анда къазауат эте тургъан жашланы суратлары кёргюзтюлгендиле. Школчула уа аланы хар бирини да юсюнден къысха билдириуле этгендиле.

Аттоланы Борис а Акъ-Сууда  атларын ёмюрлюк этерча адамла  кёп болгъанларын чертгенди. Озгъан жылланы эсге тюшюре, Совет Союз Уллу Ата журт урушну кезиуюнде битеу европалы халкъланы немисли фашистледен эркин этгенин, кесин да къоруулаялгъанын эсгертгенди. 

- Энди уа ала   Россейге къажау сюеледиле, кёп къыралла аны жокъ этер ючюн  къадалып кюрешедиле, аскерлерин, сауутларын да аямай. Алай, жууукъ заманда битеу бу къужур ишлени ахыры келир да, жашларыбыз хорлам бла юйлерине къайтырла. Аны ючюн а  барыбыз да биригирге керекбиз,- деп белгилегенди ол.

Байсыланы Темиржан а  Луганскга гуманитар жюк элтип баргъан бир кезиуню эсгергенди. 

- Тюкеннге суу алыргъа киргенибизде, тауча сёлешгенлерин эшитип, аскерчилени къатларына барып, саламлашабыз, кёп хапар да айтабыз. Аладан бири сизни элли Жашууланы Аслан эди. Жашларыбыз анда да батырлыкъларын кёргюзтедиле. Аланы хар бири да  жигитлеча сермешедиле. Ала бла ёхтемленебиз,- дегенди Байсы улу.

Ызы бла сёз СВО-да  жаралы болуп къайтхан  Жашууланы Сафарбийни жашы Асланнга берилген эди. 

- Биз  Уллу Ата журт урушда Хорламны келтирген эллилерибизни юлгюлеринде ёсгенбиз. Энди ёсюп келген тёлю да мени тенглеримден юлгю аллыкъларына ишексизме , - деп белгилегенди ол. Гергъокъланы Джамболат а акъ суучу жашланы бир къаууму бюгюнлюкде да СВО-да аскер борчларын бет жарыкълы толтура тургъанларын айтханды. Ётгюр да, жигит да жашланы ёсдюрген ата-аналагъа, аланы патриот ниетде юйретген устазлагъа да уллу ыспас этгенди.

Андан сора СВО-да къуллукъ этген жашланы ата-аналарына Ыспас къагъытла, гюлле да берилгендиле. Эл администрациягъа бу байрамны къураргъа эмда бир ненча кере энчи аскер операция бардырылгъан жерлеге болушлукъ жыйышдырып ашырып тургъан Махийланы Амаш, Кючмезланы Темирлан эм Тогъузаланы Осман да ары чакъырылып эдиле. Махий улу белгилегенича, ала не заманда да жашлагъа, эллилерине да билеклик этерге хазырдыла. Ол чертгенича, жаланда биригип хорларгъа боллукъду халкъ не къыйынлыкъны да. 

Тюбешиуню бютюн жарыкъ, эсде къалырча этиуге актёр эм журналист Атмырзаланы Расул юйретген школчу жашла бла къызла, белгили жырчыларыбыз Занкишиланы Марат, Аппайланы Алим,  Алчакъланы Артур, Таукенланы Салим  уллу къыйын салгъандыла. Ингир тюз тепсеу бла бошалгъанды.