Тамамланнган, толтуруллукъ проектле да кёпдюле

Кёп болмай Чегем муниципал районну администрациясыны башчысы Юра Борсов КъМР-ни Регионнга оноу этиу арасыны «Магъаналы  соруула» рубрикасыны чеклеринде тюзюнлей эфирге къатышханды. Ол тамамланнган эм толтурулургъа тийишли проектлени, ишлеген предприятияланы, ишчи жерлени  юсюнден   билдиргенди эм тынгылаучуланы  сорууларына да  жууапла бергенди.

Юра Карабиевич, районда бардырылгъан инвестициялы проектлени юслеринден айта, бюгюнлюкде Чегемде агропромышленный комплексде   400-ден  артыкъ мюлк къармашханларын билдиргенди. Ол санда саулай  Шимал Кавказда эм уллу «Чегем-Агро» теплица комплексде,  30  аслам гектарда 600 адам уруннганларын эм жылгъа 16 минг тонна томат жыйылгъанын да айтханды.   Аны бла бирге объектни  экинчи кесегини къурулушу  бара тургъанын, ол  битсе,   уллулугъу жюз гектаргъа жетеригин,  мында жылны узуну  тахта кёгетле бла наныкъладан  50 минг тонна ёсдюрюлюрча мадар къураллыгъын да ачыкълагъанды.

Саулай алып айтханда, проектни  жашауда бардырыргъа 25,5  миллиард сом къоратыллыкъды. Теплица толу кючю бла ишлеп тебиресе уа,  1200 адам урунуругъа онг табарыкъдыла.

Къонакъ  алгъаракълада толусунлай жангыртылгъанындан сора мияла этген завод ачылгъанын, ол да Шимал-Кавказ федерал округну  мияладан этилген абериле бла жалчытхан уллу предприятияладан бирине саналгъанын билдиргенди.  Дагъыда районда иги кесек  жерде терек бахчала орнатылгъанларын, жемишледен тирликни сакълагъан энчи комплексле ишленнгенлерин, сагъынылгъан кезиуде минг адам урунургъа онг тапханларын да белгилегенди. 

Жолланы юсюнден айтханда, ол  Экинчи Чегем-Булунгу жолну  магъаналы проектледен бирине санаргъа боллугъун айтханды.   Аны хайыры бла бюгюнлюкде танг кесек иш тамамланнганды, 27 километр чакълы бирде  жол мардалагъа келиширча этиледи,  кёпюрле жангыртылынадыла эм  чыракълы чыпынла да салынадыла. Ишлени къыйын тау жерледе бардырыргъа тюшгени ючюн, объектни келир жылдан кеч къалмай бошар муратлыдыла.

Былтыр Чегем районда жолланы игилендириу бла байламлы ишле  10  километрде бардырылгъандыла. Аны кезиуюнде Экинчи Чегемде Ленин эм Чегем шахарда Кяров атлы орамлагъа тынгылы ремонт этилгенди.  Быйылны юсюнден айтханда,  820 окъуучугъа жангы ишленнген мектепге баргъан Къабарты орамгъа къараллыкъды. Аны бла   бирге миллет проектге кёре Каменкагъа баргъан жолгъа, Шалушкада бла Нартанда  Юанов эм Пачев  атлы орамлагъа да тынгылы ремонт этилликди.

Суу бла жалчытыуну  юсюнден айтханда, районну башчысы  былтыр Тёбен  Чегемде 4 километрен асламда  быргъыланы алышханларын билдиргенди. Аны бла бирге Шалушка бла Чегемде да 4 километр тенгли бирде сетьлени жангыртхандыла. 

Быйыл Чегемде 500 сабийге жангы школ,  Яникойда, Лячинкъаяда, Шалушкада эм  Нартанда сабий садла ишленирикдиле.

Аны бла бирге Чегемде район аралы больницагъа,   Яникойда, Тёбен Чегемде,  Шалушкада эм Нартанда амбулаториялагъа да тынгылы ремонт этиледи.

Тынгылаучуланы  жамауат тийрелени игилендириуню юсюнден сорууларына жууаплай, Юра Борсов былтыр Чегем шахар ючюнчю кере «Гитче шахарлада бла тарых магъаналы элледе тийрелени игилендириу» битеуроссей проектде хорлап, грантха тийишли болгъанын эсге салгъанды.  Жууукъ заманда, кюн ачылгъанлай, тийишли ишле башланырыкъдыла, ол санда  ара стадионну  тийресин,  Чегем сууну жагъасын да айбатландырлыкъдыла. Былайда аллея, сабийле ойнарча майданла,   воркаут-зона эм башха затла да къураллыкъыла.