Тамблагъы кюнню лабораториясы

Кёп болмай Къабарты-Малкъар къырал университетде  "Тамблагъы кюнню  лабораториясы" деген Шимал Кавказны жаш хунерлерин бирикдирген  уллу проект ишин башлагъанды.

Аны бла байламлы вузну мурдорунда республикада биринчи команда  къураллыкъды.  Анга жамауатны иги жанына  тюрлендирирге итиннген, хунерли эм тири жаш адамла  къатышырыкъдыла. 

Ол кюн къууанч  жыйылыу интерактив сессия бла башланнганды. Аны филология илмуланы кандидаты, Пятигорск шгахарны къырал университетини  халкъла аралы билим бериу арасыны  таматасы   Наталья Каширина ачханды. Анга къатышхан жаш адамла  къауумларына  атла да  къурагъандыла. Жууукъ заманда  экспертле бла власть органланы келечилери къатышып  тюрлю-тюрлю билим бериу модульла бла   тюбешиуле да  ётерикдиле. 

Проектни  координатору, КъМКъУ-ну тарых бёлюмюню доценти  Аскер Тумов айтханнга кёре, проектге Шимал-Кавказ федерал округдан  35 жылларына дери  жюз адам къатышырыкъдыла.

- Бизни муратыбыз  тамблагъы кюнню сагъышын этген, аны бла бирге адет-тёрени билген  жаш адамланы къауумун  къураргъады,- деп къошханды  Аскер  Тумов.

Анга къатышырыкъланы быйыл мартны орталарына дери айырлыкъдыла,  апрельде уа ала "Машук форумгъа барлыкъдыла.  Андан сора да, кюз артында экспертле да къатышып, сессия ётерикди.

«Тамблагъы кюнню лабораториясы" проектни  чеклеринде   тюбешиуле ётерикдиле, ол санда   технология,  экономика эм  гуманитар жаны бла билимлерин ёсдюрюрча майданла ишлерикдиле. Алай бла КъМКъУ  Шимал Кавказда   инновация араладан бири боллукъду.