Мирзеуню тышына тинтмей жибергенлеге - эсгертиуле

Россельхознадзорну Шимал Кавказда регионла аралы управлениясында  быйыл  Къабарты-Малкъардан тыш регионлагъа карантин сертификатны жарашдырмай, 26,5 минг тонна мирзеу ташылгъанын ачыкълагъандыла. Специалистле аны «Аргус-Фито» эм «Зерно» къырал системалагъа къарагъанда тохташдыргъандыла.

Бузукълукъ этген «Агрорегион» биригиу «Зерно» системада Астрахань шахаргъа жибериллик 3,8 минг тонна мирзеуню къагъытларын жарашдыргъанды. Алай ызы бла Россельхознадзордан карантин сертификатла алыргъа керек эди да - аны уа этмегенди.

Ведомствода эсге саладыла: Къабарты-Малкъарда амброзия эмда сабанлы повилика деген заранлы хансла ёсюу бла байламлы 268 карантин тийре барды. Аладан чыгъарылгъан продукцияны тышына тинтмей ашырса, ол бу заранлы битимлени башха регионлагъа да жаяргъа боллукъду. Аны ючюн бу жол Россельхознадзор аллай бузукълукъ этген организациялагъа оналты эсгертиу къагъыт жибергенди.