Жараула бардырыр онгла ачыллыкъдыла

«Единая Россияны» оноучулары «Россейни кючю» битеуроссей спорт эришиуле ачылгъанларын белгили этгендиле,  ала 3 сентябрьге дери бардырыллыкъдыла.

Быйыл анга къатышханланы Ата журтну къоруулаучуларыны аскер эм спорт жетишимлерини юслеринден билирге онглары боллукъду. Бу кезиуде аскерчилеге, ветеранлагъа, аланы жууукъларына, къазауатда сакъатлыкъ тапханлагъа жараула бардырыугъа энчи эс буруллукъду.

- «Россейни кючю» спорт марафон къыралны битеу регионларында бардырылады. Ол жаш адамланы спорт бла кюреширге кёллендиреди, дагъыда аланы чемпионла бла танышыргъа онглары барды. Ата журтну къоруулаучусуну жылында марафоннга энчи аскер операцияда болгъан аскерчиле къатышханлары уа бютюнда багъалыды.  Ала ёсюп келген тёлюге ариу юлгюдюле,-дегенди партияны генсоветини башчысы Владимир Якушев.

«Россейни кючю» марафон хар инсаннга да уллу къауумну кесеги болгъанын сезерге,  къарыууна ийнаныргъа болушады, деп акъыл этеди «Единая Россияны» жанлыларыны ара советини башчысы Ольга Занко.

- Регионлада жашагъанла спортну кёп тюрлюлери бла кюрешаллыкъдыла. Ол санда хоккей, женгил атлетика, конькиледе учуу эм башхала. Быйыл а марафон Ата журтну къоруулаучуларына аталгъаны артыкъда магъаналыды. Аланы жигитликлери, жетишимлери сынауладан къутулургъа кюч бередиле,-дегенди ол.

Эсигизге салайыкъ, проект партия жанлыланы башламчылыгъы бла халкъ программаны «Инсан бирлик эм жаш тёлю политика» бёлюмюню чеклеринде толтурулады. Ол 3 сентябрьге дери бардырыллыкъды – Экинчи битеудуния уруш бошалгъан кюннге дери. Анга къошулгъанла белгили тренерле, спортчула бла хакъсыз жараула бардыраллыкъдыла. Анга къатышыргъа сюйгенле     https://sila-rossii.er.ru/  электрон адресде эсепге турургъа боллукъдула.

Къабарты-Малкъарда да проектге хазырланыу жаны бла жумушла толтуруладыла, деп билдиргендиле KABARDIN-BALKAR.ER.RU сайтда.

- Спорт министерствону болушлугъу бла марафоннга хазырланыу жумушла толтуруладыла. Бу кезиуде тюрлю-тюрлю эришиуле бардырыргъа белгиленеди. Алагъа белгили спортчула, тренерле эмда партияны депутатлары къатышырыкъдыла,-дегенди партия жанлыланы советини регион бёлюмюню башчысы Шауаланы Разият.