Сатыу-алыу бёлюмде - ахшы ёсюм

Былтыр Май районда къолдан сатыу-алыуну ёлчеми 1,4 миллиард сомгъа жетгенди. Ол, буруннгу жыл бла тенглешдиргенде, 25,8 процентге кёпдю. Саулай алып айтханда, экономиканы бу бёлюмю жер-жерли бюджетге 10,5 процент файда келтиреди.

Сатыу-алыу бла кюршегенлени кёбюсю, неда 74 проценти  энчи иелиледиле. Уллу эм орта организациялагъа уа 26 процент жетеди. 

Алгъадан чыгъарылгъан эсеплеге кёре, Май районда аш-суудан  - 727,2 эм башха товарладан да 695,3  миллион сом багъасына сатылгъанды. Алай бла  сагъынылгъан кезиуде эки къауумда да 5 эм 9,4 процент ёсюм эсленеди.

Май районну администрациясы  сатыу-алыу  бёлюм айнырча иги болум къураргъа итинеди.Ол санда  предпринимательлеге  болушурча эм алыучула да иги эм учуз продукция бла жалчытылынырча   терк-терк ярмаркала бардырыладыла.

Аны бла бирге стационар болмагъан сатыу-алыу объектле да аслам бардыла. Арада ангылаусузлукъ болмазча, аллай  жерлени да схемасы барды. Жыл сайын сатыучуланы санына къошула баргъаны себепли  аны  тюрлендирирге    тюшеди. 
 

Эсге сала айтсакъ, бюгюнлюкде стационар болмагъан сатыу-алыу  жерлени саны 23  жетеди.