Жерлешлерибиз – Индияда кёрмючде

КъМР-ни Сатыу-алыу-промышленность палатасы къурап, бизни республикадан предприниматель къауум кёп болмай Индиягъа барып келгенди. Ала анда бардырылгъан «BHARAT TEX 2025» халкъла аралы кёрмючге къатышхандыла, деп билдиргендиле Палатадан.

Бу кёрмючде къумач согъуу бла байламлы абериле кёргюзтюледиле. Ол 14-17 февральда Нью-Дели шахарда ётгенди. Бизден баргъан къауумну башчысы уа Палатаны къумач согъууда эмда женгил промышленностьда предпринимательство комитетини башчысы Вадим Демьяненко эди. Делегацияда 21 адам бар эди, ол санда «Арсатекс» эм «Текстиль Имидж» предприятияланы башчылары Замир Сасиков бла Кючменланы Эдуард, энчи предприниматель Индира Кашкулова да. Ала ишчи тюбешиулеге къатышхандыла, жангы продукцияла эмда технологияла бла шагъырейленнгендиле, талай келишим да этгендиле.

Кёрмючде Россейден баргъан 150-ден артыкъ компания да продукцияларын кёргюзтгендиле. Ары Индияны башчысы Нарендра Моди да келген эди. Къонакълагъа салам берип, ол бу жумушну магъанасы уллу болгъанын чертгенди.