Кёрюмдюлени эмда алларында тургъан борчланы сюзгендиле

КъМР-ни Башчысы Казбек Коков КъМР-ни цифралы айныу, связь эм асламлы коммуникацияла министри Аскер Бозиев бла тюбешгенди. Ол аны юсюнден кесини телеграм-каналында билдиреди.

«Озгъан жылны къауум кёрюмдюлерине къарагъанбыз эм ведомствону аллында тургъан борчланы сюзгенбиз. Къабарты-Малкъар цифралы айныу бла федерал рейтингде жыйырма тапкагъа ёрге кётюрюлгенди эм 31 жерни алады, къыйматлы ишлегенлени къауумларында уа биринчиди.

Министерствону ишини магъаналы бёлюмлеринден бири- битеу республикада Интернет тутхучлу ишлерча этиудю, ол санда узакъда орналгъан эллерибизде. Ол жумушну тамамлау билим бериуде эм саулукъ сакълауда да ишни тийишлисича бардырыргъа себеплик этерикди.

 Озгъан жылда  терк ишлеген Интернет Огъары Чегемде, Эл-Тюбюнде,  Залукодесде, Дженалда, Ташлы-Талада эм Дальний элде ишлеп тебирегенди. Андан сора да, цифралы айныуну магъаналы бёлюмю - къырал жумушланы тийишлисича тамамлауду.

Бир жылны ичинде КъМР-ни жумушланы тамамлагъан кёп функциялы араларына инсанладан 1,4 миллион къагъыт келгенди. Аланы тилеклерин заманында толтуруу бла байламлы тинтиуле бардырыладыла. Халкъ асламла бла байламлыкъ жюрютген платформаны юсю бла 20 минг адамны жумушу тамамланнганды.

 Къырал жумушланы тамамлау эм инсанла бла байламлыкъ жюрютген амалла игилендириле барлыкъдыла. Андан сора да, связь бла байламлы инфраструктура да айныйды. Шахарлада къурулуш ишлени бардыргъанда, информация системаланы сингдириу жаны бла мадарла этиледиле, дагъыда Къабарты-Малкъар Республиканы бирикген Интернет-порталын къураргъа мурат барды.

Министерствону жангы ишине республикалы асламлы коммуникацияла бёлюмю киреди (газетле, журналла, радио, телевидение). Ала ары озгъан жылны аягъында федерал министерствода бардырылгъан тюрлениулеге кёре кёчюрюлгендиле, деп айтылады билдириуде.