Сууукълада сакълыкъ изленеди

Гидрометеорология араны билдириуюне кёре, бу кюнледе Къабарты-Малкъарда хауа кече иги да сууукъ болуп турлукъду. Бир-бир жерледе ол орталыкъ мардадан он градусха тюшюп, -15…-20 градусха окъуна жетерикди. Аны ючюн а газ бла жалчытхан инфраструктура болгъанындан эсе къатыракъ ишлейди. Анга кёре «Газпром газораспределение Нальчик» компанияны битеу бёлюмлери да бек сакъ болгъандыла, деп билдиредиле андан.

Ызланы эмда объектлени кёк отлукъ бла жалчытыуда чурум чыкъмаз ючюн, онтёрт машинада жарым жюзден артыкъ специалист жер-жерлеге мычымай жетерге боллукъдула. Компанияны башчысыны орунбасары Мурид Мацухов айтханнга кёре, авариялы бригадала бары кече-кюн демей ишни къолгъа алыргъа хазырдыла. Хайырланыучуладан а быллай сууукълада бютюнда уллу сакълыкъ изленеди. «Газ ийисни сезсегиз, олсагъат 04 неда 104 номер бла авариялы службагъа сёлешип билдиригиз», - дегенди ол.

Эсгертиу. Кёк отлукъну къоркъуусузлу хайырланыр ючюн, ожакълада хауа женгил айланырча, тютюн да тышына терк кетерча этерге керекди. Газ бла ишлеген приборла (котёл, колонка, печь) тургъан отоулагъа тышындан хауа келирге керекди – ол да баш жорукъладан бириди! Дагъыда ишлей тургъан печьни къатындан кетмегиз.