Эм кючлюлени санында

Нальчикде Универсал спорт арада эстетика гимнастикадан округну биринчилиги  эмда «Тауладан да бийик» деген эришиу бардырылгъандыла. Эки кюнню ичинде майдалла ючюн алты жюзден аслам спортчу сынашхандыла.

Эстетика гимнастика - спортну эм ариу тюрлюлеринден бириди, эришиуню ачылыуу да анга кёре ариу болгъанды, къараучула да аслам келгендиле. Жыйылгъанланы алгъышлай. Эстетика гимнастиканы халкъла аралы федерациясыны башчысы Лилия Морозова, жылдан жылгъа гимнасткаланы усталыкълары ёсе баргъанын белгилеп, республикалы федерацияны, тренерлени да ишлерине бийик багъа бичгенди.

Спортчуланы араларында уа гитчечикле, сынамлыла да болгъандыла. Биринчиликге бизни республиканы, Шимал Осетияны, Ставрополь крайны бла Дагъыстанны келечилери къатышхандыла, «Тауладан да бийик» деген эришиуге гитче жыл санда спортчула къатышхандыла. Къабарты-Малкъарны Эстетика гимнастикадан федерациясыны башчысы Светлана Михайленко билдиргеннге кёре, анга башда сагъынылгъан регионладан, сора Краснодар крайдан, Ростов областьдан, Къалмукъдан, Донецк Халкъ Республикадан да къызчыкъла келгендиле.

Эришиуле къауумланы араларында ётдюрюлгенлери себепли жюри спортчула бирча эм бир бирлери бла байламлыкъда тепгенлерине къарагъанды, ала гитче сахна оюн кёргюзтгенчадыла. Сёз ючюн, Осетияны «Аделика-Сияние» къауумуну келечилерини эришген кезиуде бир бирлерине сакъ болгъанларын айтадыла. Мында низамны, техниканы да магъаналары уллуду. Республикабызны «Эльбрус-Сириус» къаууму бу эришиуде къарыуларын талай кёре сынап кёргендиле, анга кюн сайын да къатышыргъа сюедиле.

Эсеплеге кёре, биринчиликде республикабыздан 12-14-жыллыкъланы араларында «КБР-Эльбрус» хорлагъанды. 14-16-жыллыкълада «Эльбрус-Олимпия» - биринчи, «Эльбрус-Горянка» уа – экинчиле болгъандыла. Хорлагъанла кубокла, майдалла эм грамотала бла саугъаланнгандыла. Ала энди Москвада къыралны кубогуна бла «Россейни ышаныуу» деген эришиуге къатышырыкъдыла.