Къоркъуусузлукъгъа - аслам эс

Былтыр «Россети Северный Кавказ» – «Каббалкэнерго» биригиуню келечилери   мектепледе электрокюч бла байламлы къоркъуусузлукъну юсюнден 64  чакълы ачыкъ дерс бардыргъандыла. Саулай алып айтханда, анга 7-16 жыллары болгъан 2,4 минг чакълы сабий къатышхандыла.

Дерслени кезиуюнде электрокючню юсюнден  магъаналы шартланы эслерине салгъандыла. Сёз ючюн, ток болгъан жерге, ол санда  трансформаторлагъа эм башха объектлеге да  жууукълашыргъа, ёрлерге,  къатларында от этерге жарамагъанын ангылатхандыла. Юйде  уллуладан адам болмаса   электроприборла бла къалай тюрлю кюреширге кереклисин да билдиргендиле. Ток урургъа къоркъуулу жерден къалай чыгъаргъа,  биринчи медицина болушлукъ берирге  да юйретгендиле. Андан сора да,  «Россети»  биригиуню  «ВКонтакте» сетьде  электрокюч бла къоркъуусуз кюреширча энчи проектни юсюнден да хапарлагъандыла.

Эсге сала айтсакъ, электрокюч бла  байламлы инсанны хатадан сакълау «Россети Северный Кавказ" биригиуню баш борчларындан бири болгъанлай къалады.  Къоркъуусузлукъдан билимлерин ёсдюрюу бла байламлы  профилактика халда акцияла  комплекс программаны чеклеринде жыл сайын бардырыладыла.