Жангы окъуу жылгъа – жангы школла

«Единая Россияны» себеплиги бла РФ-ни Жарыкъландырыу министерствосу бла бирге быйыл къыралда билим бериуню 1,5 мингден аслам мекямы тынгылы жангыртыллыкъдыла.  Юч жылны ичинде партияны халкъ программасында  4,5 мингден аслам окъуу юйню тапландырыргъа белгиленеди. Аны юсюнден «Единая Россияны» генсоветини секретары   Владимир Якушев партияны бла министерствону школланы тапландырыу жаны бла штабыны жыйылыуунда айтханды.

-Алгъыннгы тюбешиуде къурулуш ишлени болжаллары белгиленип, хар кимге да буйрукъла берилгендиле. 10 февральгъа дери конкурс жумушла бошалыргъа керек эдиле, 20 мартда  келишимле къабыл кёрюлюрге тийишлидиле. Бу болжалла къалай сакъланнганларын тинтгенлей турлукъбуз,-дегенди ол.

2022 жылдан бери уа къыралда 4932 школгъа тынгылы ремонт этилгенди, аладан 20 процентине (847) – былтыр.

Генсоветни секретары жумушланы жетишимли толтургъан, артха къалгъан регионланы да белгилегенди. Ол айтханыча, 2024 жылда 293 жангы школ ишлетилгенди, алада 217,5 минг окъуу жер къуралгъанды. 2019 жылдан бери уа къыралда 1634 билим бериу учреждение ишлетилип, хайырланыргъа берилгенди. Дагъыда 1688 сабий сад битдирилип, алада 246 минг сабийге жерле бардыла.

- Президент 1300 жангы школ ишлетирге буйрукъла бергенди. Бу тарихлени 25 процентге артыгъы бла толтуралгъанбыз,-деп къошханды партияны оноучусу.

Жарыкъландырыу министр Сергей Кравцов школла, сабий садла къалай ишлетилгенлерине, колледжледе жангыртыу ишлени болумларына кёре жамауатда партиягъа, власть органлагъа да кёз къарам къуралгъанларын чертгенди.

- «Единая Россия» - керти ишлени партиясыды. Алай борчларын кереклисича толтурмагъанлагъа тийишли оноула этилирге керекдиле,-дегенди министр.

Сергей Кравцов президент программада белгиленнген битеу жумушланы толтургъан регионлагъа ыразылыгъын айтханды. Аланы арасында уа Чечен эм Дагъыстан республикала да бардыла.

- Бюджетлерини файдалыкъларына кёре регионла тенг тюйюлдюле. Ол себепден ахча жетмейди деген сылтау терсди, жетишимле башчылыкъны тюз этиу бла байламлыдыла,-дегенди ол.

 Министр айтханыча, 1 сентябрьге тынгылы жангыртыу жумушланы асламы битдирилирге керекди (75-80 проценти). Болжалланы сакъламагъан регионладан а  келир кезиуде бёлюннген ахчаны тыярыкъдыла. Аны орунуна субъектни кесини файдаларындан толтурургъа тюшерикди.

  Жыйылыуну ахырында Владимир Якушев регионланы келечилеринден Билим бериуню 2036 жылгъа дери айнытыуну стратегиясын сюзюуге къатышыргъа тилегенди. Документ РФ-ни Президентини буйругъу бла хазырланнганды. 

 - Аны тыгылы сюзеригизни тилейме. Партия башламчылыкъланы жыйышдырлыкъды. Документ къыралыбызны келир кюню бла байламлыды. Жаш адамларыбыз къаллай билим аллыкълары Россейни конкуренциясына, дунияда жерине себеплик этерикди,-дегенди ол.

Къабарты-Малкъарда  быйыл 10 школну къурулушун битдирип, хайырланыргъа берирге белгиленеди, деп билдиргендиле KABARDIN-BALKAR.ER.RU сайтда. Аны юсюнден КъМР-ни Башчысы, партияны регион бёлюмюню секретары Казбек Коков правительствону келечилери бла кенгешде айтханды.

Ала окъуучулагъа эшиклерин 1 сентябрье ачарыкълары да чертилгенди. «Алгъын биз жылны ичинде 10 школну бир заманда да ишлетмегенбиз, толтуруллукъ жумушла кёпдюле»,-дегенди Казбек Коков.

Эсигизге салайыкъ, школланы тынгылы жангыртыу партияны халкъ программасына киреди. Бу жумушла РФ-ни Президентини башламчылыгъы бла тамамланадыла. Мекямланы проектинден башлап, аланы хайырланыргъа бергинчи, битеу ишлени жамауат штабла тинтгенлей турадыла. Аланы къауумларына сенаторла, партияны депутатлары, ата-анала, устазла киредиле.  2022 жылдан бери Россейде 4,9 минг школ тапландырылгъанды. «Билим бериу» миллет проектни чеклеринде 1300 жангы школ ишлетилгенди.