Ётгюрлени тау тыймаз

Кёп болмай Орус география  биригиуню Къабарты-Малкъар къырал университетни менеджмент, туризм эм къонакъбайлыкъны къурау институтунда ачылгъан  «Тау адамла» жаш тёлю клубуну келечилери огъурлу  ишге къатышхандыла:   Уллу Хорламны 80-жыллыгъына жоралап, «Альтаирден» тенглери бла бирге Чегем ауузунда Таракъланы башына, 2277 метр бийикликге, ёрлегендиле. Тёреде жюрюгенича, 1942-1943 жыллада Кавказ ючюн сермешледе ёлгенлеге эсгертме къанга да  салгъандыла. 

Бу жол акциягъа сынамлы альпинистле эм кеслерин биринчи кере сынагъанла да къатышхандыла. 

«Тау адамла» жаш тёлю  клубну башчысы, экономика эм туризмде менеджмент кафедраны ассистенти  Станислав Кущев быллай ишле жаш адамланы альпинизмден сынамларын ёсдюргенден тышында, патриот сезимлерин кючлеуге да  ахшы къошумчулукъ этгенлерин чертип айтханды.  

- Иги кесек къар жаугъаны себепли Таракълагъа ёрлерге  тынч болмагъанды. Болсада маршрутну тамашалыгъы къыйналгъаныбызны уллу сездирмегенди. Тауну башында эсгертме къанга  салгъан кезиуюбюзде жигитлерибиз  ючюн ёхтемленнгеним кёкюрегиме сыйынмагъанды.  Быллай такъыйкъалада тарыхха башха кёзден къарайса эм жашауну багъаларгъа да  юйренесе, - дегенди Станислав  Кущев. 

Бу жолгъу экспедиция КъМР-ни Курортла эмда туризм министерствосу, РФ-ни ФСБ-сыны КъМР-де Чекчи управлениясыны эм  МЧС-ни регион бёлюмюню  болушлукълары бла  къуралгъанды.