Аскерчилеге кёл салып тынгылагъандыла

Бу кюнледе,  КъМКъУ бла «Ата журтну къоруулаучулары» фонд къурап, энчи аскер операциягъа къатышхан ветеранла бла Ата журтну къоруулаучуну кюнюне жораланнган тюбешиу ётгенди.  

Бетден-бетге тюбеп бардырылгъан ушакъны кезиуюнде ары келген жаш адамла аскерчилени хар бирини да энчи жашауларыны юсюнден, Ата журтубузгъа кёз къарамларын да билгендиле. Ала кеслери да студентледен артыкъ тамата тюйюл эселе да, жашауларында кёпню кёргендиле. Аланы хар бирини да юслеринден видеосюжетле алдырылгъандыла. Алай алада атлары айтылгъан бла кёргюзтюлген жигитлени ахырына дери толу ачыкълагъанча кёрюнмейди. Аны себепли, аланы жашаугъа кёз къарамларын, СВО-да не зат бла тюберге тюшгенин да жаш тёлю кеслеринден соруп билирге итиннгенди.  

Студентлеге къонакъгъа чакъырылгъанланы араларында уа КъМКъУ-ну граждан-патриот  ниетде юйретиу арасыны таматасы Герман Шевчук, «Ата журтну къоруулаучулары» фондну регион бёлюмюню таматасы Чеченланы Эльдар, ветеранла Ахмед Пшихачев бла Роман Коваленко эмда университетни медицина факультетини студенти, энчи аскер операцияда кёплени жашауларын сакълагъан медик жашыбыз Жашууланы Аслан бар эдиле. 

Биринчи сёз да Жашуу улуна берилген эди. Ол СВО-гъа дери Нальчикде Республикалы сабий больницаны реанимациясында ишлеп тургъанын айтханды. Аскерге  чакъырыу къагъыт келгенде уа, аз да сагъыш этмей, атланнган эди. Башха врачла бла ол кёп аскерчини уруш аулакъладан чыгъаргъанды. Бек онгсузларына уа кеслери операцияла бардыргъанларын да билдиргенди. Ол хапарын бошагъандан сора, тенглери аны юсюнден бир сейир шартны туура этгендиле. Аскерден къысха солуугъа келген Жашуу улу биринчиден сабий реанимациягъа баргъынчы, кеси юйюне атланмайды. Анда ол СВО-гъа кетгинчи тюшген гитче саусуз сабий турады. Аслан аны кёргюнчю, халин соргъунчу, тынчаймайды. Ма анда сора атланады жаш кесини ата юйюне, ёз сабийлеринден, анасындан да тансыгъын алыргъа. Бу шарт а аны адамлыгъы, халаллыгъы да уллу болгъанын ачыкълайды. Врачла Асланчала болургъа кереклиси хакъды. Энчи аскер операцияда ол къутхаргъанланы саны 5 мингден атлайды. Аланы санауну ол эртте къойгъанды. 

Ызы бла ушакъгъа Роман Коваленко къошулгъанды. Ол профессионал аскерчиди. Сермешден сора эс жыйып, аякъларыны болмагъанын ангылагъандан сора, биринчиден, кесин гранат бла атдырыргъа сюйгенди. Алай олсагъат аны кёз аллына анасыны бушуулу бет сыфаты келеди. Сора жаш, анга аллай къыйынлыкъны сынатыргъа эркинлиги болмагъанын ангылап, ол тапсыз акъылдан кери болуп, жашауун андан ары бардырыргъа таукел болады. Сакъатлыгъына да къарамай, Роман протезледе окъуна спорт бла кюрешиуюн къоймагъанды. Жаш заманында женгил атлетика бла кюрешип тургъаны анга шёндю бек жарагъанды. Терк окъуна хали игиге айланып, кючю къайтханды. 

Тенглери ол паралимпиадагъа къатышып, жетишимли болурун сакълай эдиле. Болсада Роман  эришиулеге угъай, СВО-гъа экинчи къайтып барыргъа хазырланнганды. Барып, артха, юйюне, ол 2024 жылны декабрь айында  келгенди. Саулай да къыралда Роман жангыз аскерчиди протезледе контрактын ахырына дери толтура къуллукъ этген. Аны тёзюмлюгю бла Ата журтуна сюймеклиги юлгюлюдюле. Бюгюнлюкде ол «Ата журтну къоруулаучулары» фондда ишлейди.  

Чеченланы Эльдар а къарындашыны юлгюсю бла МВД-ны Санкт-Петербургдагъы аскер институтун бошагъандан сора, усталыгъы бла он жылдан артыкъ ишлегенди. Бир къауум заманны ол чыгъармачылыкъ ишге берилип, актёрлукъ бла жетишимли кюрешип да тургъанды. Энчи аскер операция башланнгандан сора, мобилизация бла Запорожье областьдагъы танк бёлюмге тюшюп, уруш бардыргъанды. Кёп сабийли ата болгъаны себепли, бир жылдан юйюне къайтады. Шёндю ол «Ата журтну къоруулаучулары» фондну регион бёлюмюню таматасыны орунбасары болуп ишлейди, беш сабий ёсдюреди эм жаш тёлюню патриот ниетде юйретиуге энчи эс бёледи. Эльдар аскерден къайтханланы право бла байламлы жарсыуларына къарайды. 

Къабарты-Малкъарда белгили дин къуллукъчу Анас хажи Пшихачевни жашы Ахмед аскер къаугъаланы ветераныды. Ол БПЛА бла разведка бардыргъан тасхачы къауумну командири болуп тургъанды. Калининграддагъы чекчи институтну бошагъандан сора, анга Кърымда къуллукъ этерге тюшгенди. СВО башланнган кезиуде Ахмед запасда эди. Алай артха аскерге къайтыргъа сюйюп, он кере тилеп кёргенди. Болмагъандан  сора, кеси ыразылыкълары бла тебирегенлени къауумуна къошулуп, алай кетгенди. Анга тасхачыланы бла чабыууллукъ  бардыргъанланы къауумларында къуллукъ этерге тюшеди. 

Шёндю ол реабилитацияны ётеди эм аны бла бирге энчи аскер операциягъа тебирегенлени хазырлау жаны бла ишни бардырады. Дагъыда «Ата журтну къоруулаучулары» фондну регион бёлюмюню социал координатору болуп да ишлейди. Аны борчу – аскерчилеге бла ветеранлагъа эмда ёлгенлени юйюрлерине болушлукъ тапдырыуду. Ахмед кеси белгилегеннге кёре, ол  кимден да иги биледи СВО-дан къайтхандан сора, алгъынча жашау бардыргъан  тынч болмагъанын.