Энтта да бир мектеп ишлене турады

Прохладна районда Прималкинское элде жангы мектеп ишлене турады. Бу объектни къурулушу «Шёндюгю школ» деген къырал проектни чеклеринде барады, дегендиле КъМР-ни Къурулуш эмда ЖКХ министерствосунда.

Элде, эм азындан, алты минг адам жашайды. Аны себепли школ анда бек изленеди. Жангы мектеп юч къатлы боллукъду, кеси да беш бёлюмден къураллыкъды. Алада уа  классла, солуу тийре, спорт зал, административ эмда техника жумушлагъа бёлюннген отоула ачыллыкъдыла. Школда 500 сабийге окъургъа онг боллукъду. Аны себепли элде бу жаны бла излем толусунлай жалчытынырыкъды.

Бюгюнлюкге объектни башы жабылгъанды, ичинде сюртюу-бояу ишле бара турадыла. Дагъыда специалистле актовый залында эшиклени, вентиляция системаны орната эмда сахнаны да жарашдыра турадыла. Спорт залда уа къабыргъаларын жасап, тюбюне да линолеум жайып, бошаргъа кёп къалмагъанды. Школну къабыргъаларын да кирпич бла тышлагъандыла, ызы бла ишчиле аны тийресин тапландырыу эмда тёгерегин бегитиу бла кюреше турадыла.

Алайды да, жангы мектеп окъутуу, таплыкъ жаны бла бар излемлеге келиширикди. Элде къуру билим бериу угъай, маданият жаны бла да ара болургъа ушайды ол.