Тереклеге дарман сепген техника

Шимал Кавказны тау эмда тау этекледе терек бахчачылыкъ жаны бла илму-излем институтуну специалистлери, Къабарты-Малкъар къырал аграр университетни алимлери бла бирге, былтыр «ГербиСК-2000» деген машинаны къурагъан эдиле. Аны сынам халда биринчиден институтну кесини, ызы бла уа «Сад-Гигант» компанияны бахчаларында талай заманны ишлетип кёргендиле. Аны эсеплерине кёре бу техника къыйматлы боллугъун, быллай бахчалада кенг хайырланыргъа жарарыгъын белгилегендиле.

«ГербиСК-2000» тракторгъа тагъылгъан «темир къол» маталлы оборудованияды. Аны бла бирге техниканы арт жанына эки минг литр кирген чыккырны тагъадыла. Бу уа андан гербицидлени неда башха препаратланы алып, аллында жан-жанына чачады. Быллай «темир къолу» болгъан трактор ишин орталары 3-5 метр бла чекленнген тизгинледе эталлыкъды. Кеси да дарманланы бир кезиуге 20 гектарда (сагъатха – 3,5 га) чачып чыгъаллыкъды. Сёзсюз, ол ишни терк эмда тынгылы этерик амалды. Машинаны ишлетирча жаланда бир механизатор керекди.