Суратла, эрттегили сауутла да

Нальчикде А.Л. Ткаченко атлы музейде шахарчылагъа, къонакълагъа да Айвазовскийни, Брюлловну, Шишкинни, Дубовскийни суратларыны кёрмючю къуралгъанды. Андан тышында, музейде къытай санат бла шагъырейленирге онг болгъанды.

Айтхылыкъ суратчыланы 245 ишлери салыннгандыла, ала музейни архивинде кёп жылланы ичинде жыйыла сакъланнгандыла. Аланы кёрмючлери алгъаракълада къуралгъанды, бусагъатда уа алагъа къытай фарфорну да къошхандыла. Музейни экспозия-кёрмюч бёлюмюню башчысы Нина Леонтьева эсгертгенича, Европа фарфорну юсюнден оналтынчы ёмюрде Марко Полону жолоучулугъундан сора билгенди. Сейир жарашдырылгъан миялада суратла адамланы сейирге къалдыргъандыла. Россейде уа шаркъ къыралны санатына сейир онсегизинчи ёмюрде къозгъалгъанды, кёрмючде кёргюзтюлген затла патчахланы отоуларын окъуна жасагъандыла. Бизни республикагъа къырал музейлеге къытай адырла озгъан ёмюрню аллында келтирилгендиле, алада гюлле, къытайлылагъа энчи магъананы тутхан сарыуеклени сыфатлары ишленнгендиле. Сора бу сауутла отоугъа экишер салыннгандыла, къытай миллет ала юйге игилик, монглукъ келтиргенине ийнаннганды.

Кёрмючде къыбыла Европадан, Россейден да фарфорну, революциягъа дери хайырланылгъан аякъ-къашыкъланы кёрюрге боллукъду. Ол музейни 65-жыллыгъына аталгъанды.