«Жараула жашаууму бир уллу кесегидиле»

Бабугентден фахмулу тренер, сынамлы, бийик усталыкълы гёжеф  Россейни спортуну устасы Герийланы Руслан каратеде, къол тюйюшде да жетишимлери бла белгилиди. Экинчисинде сермешлерин болжалдан алгъа хорлам бла кёп кере бошагъанды.

Спорт Русланны къанындады дерге боллукъду. Аны атасы Герийланы Хусейн тренерди, спортха кёлю-жюреги бла берилген адамды, «Бабугент» клубну къауумун  тутушуугъа бла къол тюйюшге юйретгенди. Руслан да спортну бу тюрлюлерине тёрт жылны юйреннгенди. Бир кесек замандан а, аскер къол тюйюшден секция ачылып, школну бошагъынчы ары жюрюгенди. Жарау сейир кёрюннгенди, залгъа таматаракъла да келгендиле, ала да, тренерлери  да гитче спортчулагъа иги болгъандыла. Сора, ол кезиуде, сабийликден болур, жараугъа оюннгача къарагъанды, залгъа заманын зауукълу ётдюрюр акъылда жюрюгенди. Бу ишни магъанасын абаданыракъ болгъанда ангылагъанды, сора жараулагъа да жууаплы кёзден къарап башлагъанды.

 Бийик билим алыргъа Къабарты-Малкъар къырал аграр университетге киргенди, анда «Землеустройство» жаны бла окъугъанды. Студент заманында Нальчикде къол тюйюшге тренер Хачим Мамхеговха баргъанды, анда усталыгъын беш жылны ичинде ёсдюргенди. Анда жарау этерча зал бар эди, жолгъа кёп заман къоратмазча, къатында общежитияда жашагъаны себепли, залгъа жаяу бир-эки минутха жетгени да себеплик этгенди. Спорт а окъуууна чырмау угъай, болушхан окъуна этгенди. Юйрениу-жарау этиу жыйылыугъа бир жары барыргъа тюшсе да, окъууунда артха къалмазгъа кюрешгенди. Руслан къол тюйюшден округ даражалы эришиуледе кёп кере хорлагъанды, къыралны биринчилигинде «алтынны» тёрт кере алгъанды, кубокну къытханды, Россейни чемпиону болгъанды. Эм магъаналы хорламына Россейни биринчилигинде биринчи кере алгъан алтын майдалын санайды. Ол бек жууаплы эришиу эди, анга къатышханда,  анга арыгъыракъ болургъа да тюшгенди. Ол кезиуде юйлеринде баня бар эди, эришиуге атланыргъа бир кюн къалгъанда, аны кюйдюрюп да ийгенди. Биринчиликде хорлагъанында кесин жангы даражагъа чыкъгъанын ангылагъанды.

Спорт бла кюрешиуню ахшы жанлары асламдыла, аладан бири уа тенгле кёп болгъанларыды. Герий улуну да битеу къыралда да танышлары асламдыла. «Вузда залыбызда республикабызны жер-жерлеринден жаш адамла, студентле жыйылгъандыла, анда шуёх кёп адам бла болгъанбыз, бюгюн-бюгече да бир бирибиз бла байламлыкъны юзмегенбиз. Шуёхлукъ жюрюте билиу ол да насыпны бир тюрлюсюдю, анда тенгинге кертичи болуу, кёзбаулукъ этмеу, алдатмау бек уллу жерни аладыла», - дейди ол.

Спортда жетишим болур ючюн, Руслан айтханыча, бек алгъа, жарауну тынгылы этерге, къарыуунг саркъаймазча, кюнден-кюннге кюч ала барырча, бир кюнню да жараусуз ычхындырмазгъа керекди. Экинчиси уа, итиниулюкдю, салгъан муратынга ажашмай, буюкъмай барыуду. Хау, аны ючюн бир талай затдан къуру къалгъанча да боласа, сёз ючюн, солургъа бош заманынг къалмайды.  Тюз ашау, заманында жукълау да магъаналыды да, низамны бузмаз ючюн а, психология жаны бла кючлюлюк изленеди, деп юйретеди. Спорт адамны эсин-ниетин кючлейди, кесини къарыууна ышаныргъа юйретеди. Жангыз да кючлю болуу азды, инсан акъыллы, билимли болургъа да тийишлиди. Битеу бу шартла бирге инсанны кючлю этедиле. Аны ючюн мен спорт бла кюрешгенле билимли, адежли да болур жанлыма, деп белгилейди.

- Атам юйретгени себепли, менде уллу жууаплылыкъ болгъанын ангылагъанма, - дейди Руслан. - Залда къолдан келгенни аямагъанлай, башхалагъа юлгю болургъа кюрешгенме. Жашауум саулай да спорт бла байламлыды. Волгодонскда Россейни чемпионатында саулугъума чып тюшгенини хатасындан бусагъатда эришиулеге къатышмайма. Алай аны ючюн жараууму къоймагъанма, ишимден сора залгъа келип, атам бла сабийлени юйретеме, ала да ахшы кёрюмдюлери бла къууандырадыла. Республикадан тышына кетерге умутум а жокъду.