Мадарымлылагъа – тап амал

Былтыр Россейде кёп къалмай жети минг предпринимательге МСП.РФ цифралы платформаны юсю бла 18,1 миллиарддан аслам сом берилгенди. Ол бары да эм аз ёлчемли кредитледен къуралгъан кёрюмдюдю, дегендиле КъМР-ни Экономиканы айнытыу министерствосунда.

Берилген ахчаны ючден экиси (65%) ишни андан ары бардырыргъа деп бёлюннгенди. Энтта да 30 процентин предпринимательле инвестицияла бла байламлы проектлени тындырыргъа алгъандыла, беш процентин а башха жумушлагъа къоратхандыла. Башхала бла тенглешдиргенде, быллай аз ёлчемли кредитлеге сатыу-алыу эмда жумушла бла жалчытыу бёлюмледе къармашхан предпринимательледен сурам уллуду.

Аны бла былтыр быллай бир кредитни орта ёлчеми 2,4 миллион сом болгъанды, ол 2,6 жылгъа берилгенди, аны ставкасы уа 7,5 процентге жетгенди. Сёз ючюн, коммерция банкла ахчаны андан 3-4 кереге уллу процентге бередиле.

Бу платформаны юсю бла кредит алыу жаны бла Краснодар край, Удмурт, Кърым, Татарстан республикала эмда Иркутск область алчыла болгъандыла. Талай регионда властьла предпринимательлерине ол ставканы бютюнда учуз этедиле. Аллай онг, сёз ючюн, Алтай, Приморск эмда Хабаровск крайлада, Воронеж, Калининград, Киров, Москва, Саратов, Тюмен областьлада, Удмурт эмда Чуваш республикалада бериледи.

Къабарты-Малкъарда уа гитче эмда орта предпринимательствону Аз ёлчемли кредитле бла онгдургъан фонд былтыр бу платформа бла 57 займ (11,8 миллион сом) бергенди.