Низам – къоркъуусузлукъну мурдору

Эки ыйыкъ мындан алгъа шахарны орамларында автомобильни жюрюте тургъанлай телефонланы хайырланнганланы эсеплеген камераланы орнатхандыла. Ол заманны ичинде быллай бузукълукъ этгенлеге эки жюз чакълы эсгертиу жиберилгенди. Бу тарихле жангызда бир болумгъа шагъатлыкъ этедиле – бузукълукъ этген водительле уллу кёллюлюклери ала элтген адамланы саулукъларына бла жашауларына къоркъуу салгъанына сагъышланмайдыла.

ГИБДД-дан айтханларыча, телефоннга бёлюннген водительлени хаталарындан аварияла чыгъарына къоркъуу тёрт кереге ёседи. «Машинаны смартфоннга неда башха гаджетге къарай жюрютген водитель къоркъууну заманында эслемей къалыргъа боллукъду. Юлгюге, сагъатгъа алтмыш километр терклик бла баргъан адам бир такъыйкъаны окъуна ычхындырса, оналты метрни затны кёрмей ётеди. Ол заманны ичинде не тюрлю болум да чыгъаргъа боллукъду, сёз ючюн, жаяу адам жолну ётюп башларгъа, жолну башха машина алыргъа, светофорну къызыл тюрсюню жанаргъа боллукъдула», - дейди тамата инспектор Заур Балкаров.  

Бузукълукъчуланы тыяргъа тазир болушурукъду. Камера телефонну водитель аны бла жангыз да сёлешгенинде угъай, къолуна алгъанында окъуна эсеплерикди. ГИБДД-ни управлениясыны бёлюмюню башчысыны орунбасары Алла Моторова белгилегенича, камерала шёндюгюлю оптика бла жалчытылыннгандыла, жалгъан интеллект а водительни къолларында телефонну айыра биледи. Ишеклик болса, суратны уллуракъ этип къарарча онг да барды. Алай бла халат чыкъмазына ишеклик къалмайды. Тазир жангыз да водительни къолунда телефон неда планшет кёрюнсе келликди. Отуз кюнню ичинде тёлегенлеге ол жыйырма беш процентге азыракъ боллукъду.

Кульчаланы Зульфия.
Поделиться: