Жолла мардалагъа келиширча![]() Кёп болмай Чегем районда КъМР-ни Транспорт эмда жол мюлк министерствосуну келечилери, эллени, профильли бёлюмлени таматалары къатышып ишчи кенгеш болгъанды. Ол регион магъаналы жолла мардалагъа келиширча тийишли ишлени бардырыугъа жораланнганды, деп билдириледи Чегем районну администрациясыны пресс-службасындан. Жыйылыуда быйыл муниципалитетде иги кесек жолгъа тынгылы ремонт этиллиги айтылгъанды. Ол санда къоркъуусузлукъгъа да аслам эс буруллукъду, кече жарытырча эм башха жумушла толтуруллукъдула. Аны бла бирге бюгюнлюкде "Къоркъуусуз эм тынгылы автомобиль жолла" миллет проектге кёре, магъаналы эм къыйын участкада Экинчи Чегем - Булунгу жолда тийишли ишле баргъанлары да билдирилгенди. Аны кезиуюнде жолну 27 километр чакълы кесеги мардалагъа келиширча боллукъду. Проектни чеклеринде тогъуз кёпюр да жангыртыллыкъды. Былтыр Черек чучхурладан башлап огъартын эки машина ёталмагъан жерледе жол жети метрге кенгертилгенди. Кече жарытырча чыракълы чыпынла салыннгандыла, жаяу жюрюгенлеге тротуарла, машиналагъа майданла да жарашдырылгъандыла. Къоркъуусузлукъ жалчытылынырча да бир къауум жумуш тамамланнганды. Бюгюнлюкде подряд организацияны келечилери Булунгу-Эл-Тюбю жолну 25 километринде жолну мурдорун кючлеп, жауун суу саркъырча быргъыла, арыкъла салып, жардан таш, топуракъ оюлмазча, черек жагъаларын суу таламазча бетондан хунала къуюп кюрешедиле. Кюн жылыгъа айланнганлай, асфальт жайып башларыкъдыла. Къыш кезиуде черекле таркъайгъанда, кёпюрлени чигинжилерин орнатыргъа тап болады. Анга кёре Чегем бла Жылгъы суулада тийишли ишле барадыла. Эм биринчи аркъауланы тутарыкъ чигинжилени эм хунаны да салып бошагъандыла эм башха жумушланы тамамлайдыла. Миллет проектге кёре эм Регион фонддан бёлюннген ахчагъа Чегем, Кёк-Таш, Жууннгу суу, Абардан суу, Жылгъы суу, Булунгу суу черекледе эм башха жерледе да тогъуз кёпюр жангы мардалагъа келиширча боллукъдула. Саулай алып айтханда, объектлени узунлукълары 316 метрден аслам болады. Аны бла бирге Чегем бла Башил турбазалагъа баргъан жолла да мардалагъа келиширча болгъандыла. Планнга кёре, Чегем ауузунда жолну толусунлай 2026 жылда бошаргъа керекдиле. Аны бла бирге Каменка элге баргъан жолну 1,8 километрине тынгылы ремонт этилликди. Шалушкада Юанов атлы орамны - 1,5, Нартанда уа Пачев атлы орамны 6 километри жангыртыллыкъды. Ишлени кезиуюнде эки къат асфальт жаярыкъдыла, тротуарла эм улоу тохтагъан жерле да салынырыкъдыла. Муниципалитетледе жолланы тапландырырча жумушлагъа да эс бурулгъанды. Таш орамланы болумларын игилендирирча, тротуарла салынырча эм кече жарытырча онгла сюзюлгендиле. Аны бла байламлы эллени администрацияларыны башчыларыны оюмларын билгендиле эм 2026-2028 жыллада этилирге кели жумушла да белгиленнгендиле. Саулай алып айтханда, кенгешде кётюрюлген соруулагъа специалистле эс бурурлары эсгертилгенди. Анга кёре жууукъ заманда жолланы игилендириу жаны бла проект хазыр болургъа керекди.
Поделиться:
Читать также:
07.02.2025 - 10:02 →
Электрокючню къоранчларын азайтырча
07.02.2025 - 09:05 →
Предпринимательлеге-ахшы себеплик
03.02.2025 - 13:51 →
Республикада миллион тоннадан артыкъ алма жыйылгъанды
29.01.2025 - 11:08 →
Алты мингден аслам жумушха къаралгъанды
27.01.2025 - 11:59 →
Жолла мардалагъа келиширча
|