Кёгетледен бла наныкъладан иги кесек жыйылгъанды![]() Былтыр Къабарты-Малкъарда мюлклени барында да 1 миллион тоннадан аслам алма эм башха кёгетле бла наныкъла да жыйылгъандыла. Былтыр бу заман бла тенглешдиргенде, ол 30 процентге кёпдю, деп билдириледи КъМР-ни Эл мюлк министерствосундан. Аны бла бирге былтыр Къабарты-Малкъарда экспортха 132,5 минг тонна алма жиберилгенди. Буруннгу жыл бла тенглешдиргенде, ол 17 процентге кёпдю. Продукциягъа иги кесек къошулгъаны бла алыучуланы саны да ёсгенди. Сёз ючюн, буруннгу жылда жемишле 36 регионнга сатылгъан эселе, былтыр ол 13 тизмеге кёбейгенди. Алай бла Жангы жылны аллында Къабарты-Малкъарны алмалары Иркутск, Мурманск областьланы, Красноярск крайны эм къыралны жангы регионларында - Донецк бла Луганск халкъ республикаланы сатыу-алыу точкаларында да сатылгъандыла. Эсге сала айтсакъ, алмала тышына ашырылырларындан алгъа къоркъуусуз эм тынгылы болгъанларына тийишли фитосанитар тинтиулени ётедиле. Ол себепден жыл сайын республикада ёсдюрюлген жемишлеге сурам ёсе барды. Шимал-Кавказ федерал округда жемиш эм наныкъ продукция чыгъарыу бла Къабарты-Малкъар алчы регионланы тизмесине киреди. Былтыр жылны ахырында РФ-ни Правительствосуну Председателини орунбасары Александр Новак Шимал-Кавказны терек бахчаларында ёсдюрюлген алмала толусунлай импортну алышындырыу программаны толтургъанларын да белгилегенди. Эсге сала айтсакъ, алгъаракълада алмаланы иги кесеги Польшадан келтириле эди. Бусагъатда уа Россейни регионларында сатылгъан хар ючюнчю алма бизни республикада ёсдюрюлгенди деп таукел айтырчады. Бюгюнлюкде Къабарты-Малкъарда терек бахчачылыкъланы уллулугъу 27 минг гектаргъа жетеди. Ол санда былтыр 900 гектарда терекле орнатылгъандыла. Сагъынылгъан кезиуде 43 минг тонна чакълы тирликни сакъларча сегиз энчи комплекс хайырланыргъа берилгенди. Анга кёре бюгюнлюкде бир жолгъа 300 минг тонна сакъларча мадар этилгенди. Болсада, аны бла чекленип къалмай, 2030 жылгъа ол кёрюмдюню 800 минг тоннагъа жетдирир мурат этиледи.
Поделиться:
Читать также:
07.02.2025 - 12:02 →
Элни бети-адетинде
07.02.2025 - 08:30 →
Ата-бабаларыбыз сютден, этден да къаллай тюрлю ашарыкъла хазырлагъандыла
06.02.2025 - 10:11 →
Сабийликден урунуугъа юйрене
06.02.2025 - 07:30 →
Жюреклени бийлеген тауларыбыз
05.02.2025 - 15:11 →
Мадарымлылагъа – тап амал
|