Деменгили къыралланы аралары дунияда мамырлыкъны сакълар халда болургъа керекдиле![]() Муну аллында Американы башчысыны къуллугъуна киришген жангы Президенти Дональд Трампха эм аны биринчи ишчи кюнледе къол салгъан 80-дан аслам буйрукъларына битеу дуния сейир этип тургъанды. Бир указ бла Америкада эм битеу дунияда ёмюрледен бери келген тёре юйюрню тутургъу эр киши бла тиширыу болургъа керелиси баям болуп, биягъы артха къайтарылгъанды, закон бла къагъытда. Энди алада жаланда эр киши бла тиширыу болургъа керекдиле инсанла. Алай, кеслерин ючюнчю къауумгъа санагъанла ол осал къылыкъларын къоюп, биягъы турмушларына къайтырламы деригим келеди. Белгилисича, Трамп экинчи кере оноу этип башлагъанды дунияны бек деменгили къыралларындан бирине. Эсигизде эсе, алгъын тёрт жылны ичинде ол Американы биягъы болмагъанча бай этеме деп, Россейге санкцияланы кийиргенлей тургъан эди. Аладан да бир зат чыкъмады, къыралыбыз кючлю, тюрлю-тюрлю чылмыкълагъа бютюн тутхучлу болду, халкъ а болмагъанча биригип тебиреди. Америкада озгъан жылны аягъында бардырылгъан айырыуланы кезиуюнде, Трамп халкъ бла тюбешиуле бардыргъанда, бир кюнню ичинде Украинада бола тургъан къаугъаны тохтатырыкъма деп, тургъанды. Шёндю болушлукъчусуна этген буйрукъларына кёре, ол болжалны энди 100 кюннге кёчюргенди. Мындан ары да Трамп къаллай заявленияла этеригин бир киши да билмейди, ол аллай политикди. Бек ышанабыз, аны тёгерегинде айланнган кенгешчилери эки деменгили къыралны арасында халны игилендирирча оноула этериклерин. Аны бла байламлы бир юлгю, Украинагъа юч жылны ичинде тохтамагъанлай сауутланы, ахчаланы (ачыкъ болгъан шартлагъа кёре 200 миллиард доллардан аслам) да жиберип тургъан оноучу къуллукъчуланы бу кюнледе Трамп ишлеринден бош этгенди. Аны бла бирге Россейни Президенти Владимир Путин бла не къадар жууукъ кезиуде тюбеширге сюйгенин да билдиргенди. Бизни къырал башчыбыз да бу кюнледе Къоркъуусузлукъ советни келечилери бла бардыргъан кенгешде Американы жангы оноучусу бла тюбеширге угъай демегенин айтханды. Болсада, Владимир Путин уллу жыйылыулада Украинаны юсюнден селешиуле жангыдан бардырылсала, ала толусунлай шёндюгю болумлагъа кёре ётериклерин бир ненча кере эсгергенди. Дагъыда ол озгъан жылда 30 сентябрьде ДНР, ЛНР, Запорожье эм Херсон областьла Россейге къошулгъан кюнде этген алгъышлау сёзюнде энчи аскер операцияны борчлары чегине жетдирилмей къаллыкъ тюйюлдюле деп, энтта да бир кере билдирген эди. Башхача айтханда, Россейни башда сагъынылгъан жангы регионларындан Украина аскерлерин толусунлай кетерирге керекди, ол къырал бир тюрлю аскер блоклагъа (НАТО) къошулургъа керек тюйюлдю, атом саууту болмазгъа, саулай къыралда орус халкъны эркинликлерин къайтарыу бла байламлы жумушла этилген келишимлеге кёре тамамланыргъа керекдиле. Мен оюм этгеннге кёре, Украинаны болжалы эртте бошалгъан, кюн сайын бири бирине чюйре келген билдириуле этип айланнган оноучусу Владимир Зеленский бла олтуруп, бир россейли политик да сёлеширик тюйюлдю. Ол айтхан сёзюнде турмагъан адам болгъанын энди тыш къыраллы политикле да ангылагъандыла. Германияны канцлери Олаф Шольц юч миллиард еврону болушлукъгъа берирге унамай тохтагъанды. Венгрияны бла Словакияны башчылары Виктор Орбан бла Роберт Фицо уа Зеленскийни ким болгъанын эртте сезгендиле, анга болушлукъ этиуюне да эртте тыйгъандыла. Шёндю РФ-ни Президентини болушлукъчусу, алгъын Къоркъуусузлукъ советни башчысы болуп тургъан Николай Патрушевни оюмуна кёре, Украинаны юсюнден сёлешиуле бардырылсала, алагъа жаланда Москва бла Вашингтон къатышыргъа керекдиле. Не Лондон, не Брюссель бла да сёлешгенден магъана жокъду, дегенди ол. Кесигиз кёргенликден, бюгюнлюкде европалы къыралланы оноучулары бла сёлешиулени бардыргъан, бир затха келишген, къыйындан-къыйын бола барады. Дагъыда ала этилген келишимлеге ат башындан къарайдыла, кеслерине къалай тап кёрселе, ахырында алай этедиле оноуланы. Къалай алай болса да Владимир Путин муну аллында Москва Вашингтон бла ушакъны тенг, бир бирге хурмет этиу халда бардырыргъа хазырлыгъан айтхан эди. «Биз кимден да иги ангылайбыз бюгюнлюкде эки уллу къыралны дунияда бола тургъан ишлени юсюнден къаллай жууаплылыкълары болгъанларын, ол санда стратегиялы къоркъуусузлукъну жалчытыуда да», - дегенди ол, кёп болмай РФ-ни Къоркъуусузлукъ советини жыйылыуун бардыргъанда. Дагъыда ол Россей бир заманда да сёлешиуледен артха турмагъанын эмда америкалы оноучула бла тенг байламлыкъланы жюрютюрге хазыр болгъанын билдиргенди. Къонакъланы Хасан.
Поделиться:
Читать также:
07.02.2025 - 12:02 →
Элни бети-адетинде
07.02.2025 - 08:30 →
Ата-бабаларыбыз сютден, этден да къаллай тюрлю ашарыкъла хазырлагъандыла
06.02.2025 - 10:11 →
Сабийликден урунуугъа юйрене
06.02.2025 - 07:30 →
Жюреклени бийлеген тауларыбыз
05.02.2025 - 15:11 →
Мадарымлылагъа – тап амал
|