Жетишимле ачыкъланнгандыла, борчла салыннгандыла, болжалла белгиленнгендиле

КъМР-де Ич ишле министерствону коллегиясыны кенгертилген жыйылыуунда право низамны сакълаучу ведомствону 2024 жылда ишини эсеплери чыгъарылгъандыла эмда быйылгъа борчла салыннгандыла.

Кенгешге КъМР-ни Башчысы Казбек Коков, Парламентни спикерини орунбасары Жанатайланы Салим, Экономика эм жамауат къоркъуусузлукъ советни секретары Казбек Татуев, баш федерал инспектор Дмитрий Васильченко, право низамны сакълаучу органланы таматалары да къатышхандыла.

Былтыр толтурулгъан излеу-тинтиу жумушланы юсюнден ич ишле министр, полицияны генерал-майору   Вячеслав Крючков билдиргенди. Аны айтханына кёре, тамамланнган ангылатыу жумушланы хайырындан аманлыкъланы санын азайтыргъа, болумну тийишли халда сакъларгъа къолдан келгенди. Энчи эс экстремизмни бордурмаугъа, законсуз наркотиклени сатыуну, хыйлачылыкъланы, экономикада бузукълукъланы тыйыугъа энчи магъана берилгенди.

 - Быйыл да полициячылагъа республиканы жамауатын бла келген къонакъланы къоркъуусузлукъларын сакълау, аманлыкъ этгенни терслигине жолукъдуруу жаны бла борчла салыннгандыла. Биз аланы бийик даражада толтурлугъубузгъа ышанама,-дегенди ол.

Докладыны ахырында Вячеслав Крючков республиканы оноучуларына дайым да ведомствогъа эс бурулгъаны ючюн ыразылыгъын айтханды.

Ызы бла Казбек Коков сёлешгенди. Ол полициячыла борчларын бет жарыкълы толтургъанларын белгилеп, былтыр аны хайырындан регионда  политика эм социал ышаннгылылыкъ сакъланнганларын, аманлыкъчылыкъ ёсмегенин чертгенди.

 - Инсанларыбызны эркинликлерин бла праволарын сакълау, законлукъну эм право низамны кючлеу – Россейни   праволу эм жалынчакъсыз къыралныча айныууну мурдорудула,-дегенди.

Сёзюню ахырында Казбек Коков «Нальчик» УМВД-ны полицияны участка уполномоченныйи Алим Амшоковха машина саугъаларгъа оноу этилгенин билдиргенди. Ол былтыр «Халкъ участковый» конкурсда хорлагъаны ючюн тийишли болгъанды анга.

 Ишчи борчларын бийик даражада толтургъанлары, законлукъну эм право низамны сакълаугъа салгъан къыйынлары ючюн полициячыланы уллу къаууму «За доблесть в службе» майдал, Россейни эм КъМР-ни Ич ишле министерстволарыны,  РФ-ни СК-сыны КъМР-де следствие управлениясыны Сыйлы грамоталары бла саугъаланнгандыла.

Тёреде болгъаныча, былтыр борчларын эм жетишимли толтургъан бёлюмню аты ачыкъ этилгенди. Бу жол эришиуледе Чегем районну полициячылары хорлагъандыла.

Жыйылыуда районлада ОМВД-ланы башчылары да сёлешгендиле. Кенгешде битеу айтылгъанны эсге алып, тийишли оноула чыгъарылгъандыла. Вячеслав Крючков аланы тамамлау жаны бла буйрукъла бергенди.

Тикаланы Фатима хазырлагъанды.
Поделиться: