Китабында – жашау жолларыны хапарлары

Бу кюнледе Мария бла Виктор Котляровланы басма юйлеринде чыкъгъан китапны аты «О том, что помню» деп алайды. Аны автору Энейланы Мухажирни жашы Салихди. Чыгъарманы юсюнден басманы баш редактору Виктор Котляров хапарлагъанды:

- Энейланы Мухажирни жашы Салих Къабарты-Малкъарда аты айтылгъан адамды. Аны ишчи жолунда республикалы даражалы къуллукъла болгъандыла: КПСС-ни обкомуну инструктору, КъМР-ни Къырал ырысхыгъа оноу этген къырал комитетини таматасыны орунбасары, КъМР-ни табийгъатны эм табийгъат байлыкъланы сакълау жаны бла министрини орунбасары.

Ол кеси Элбрус районну Кёнделен элинде туугъанды. 1944 жылда, битеу да малкъар халкъча, кёчгюнчюлюкню сынагъанды – Къыргъыз ССР-ни Ивановский районуну Юрьевка элинде жашагъанды.  Онжыллыкъ сабийлей бал туз чюгюндюрню бахчаларында, колхозну малларына аш хазырлауда, тирлик жыйыуда уруннганды.

1956 жылда Ата журтуна къайтханды. 1959 жылда Кёнделенде орта билим берген мектепни тауусуп, Москвада Химия-технология Д.И. Менделеев атлы институтха кирип, инженер-технолог даражаны алгъанды. 1964 жылдан башлап Эней улу Нальчикде «Севкавэлектроприбор» заводда ишлегенди, мастер, тамата мастер, рационализация эм ачыкълаула бюрону таматасы болгъанды.

2005 жылдан бери ол пенсиядады. Аны «РФ-ни граждан службасыны биринчи даражалы къырал советниги» чыны барды, «Урунууда жигерлиги ючюн» майдал, КъМР-ни Сыйлы грамотасы бла да саугъаланнганды ол. 
Китапда ветеран аны жашауунда тюбеген болумларыны, Энейланы тукъумуну, юйюрюню, жууукъларыны юслеринден хапарлайды. Чыгъармада Салих Мухажирович кеси тюбеген, байламлыкъ, шуёхлукъ жюрютген адамланы аслам суратлары, сора айбат акъ къагъытда зарфха салыннган кёп бетли къошакъ бёлеги да бардыла.

 

Поделиться: