Жаланда кертини кёргюзтюрге итине![]() Жаш тёлюню патриот ниетде юйретиуге 8-чи номерли мектепде уллу магъана бериледи. Анга школда ачылгъан музей да шагъатлыкъ этеди. Анда кёп тюрлю экспонатла бардыла. Сёз ючюн, «Школну тарыхы» деген бёлюмде окъуу юйню 100-жыллыкъ жолу суратланады, биринчи устазланы, атларын айтдыргъан окъуучуларыны да юслеринден билдириледи, Долинскде курорт къалай къуралгъанын ачыкълагъан материалла иги кесек жерни аладыла. Дагъыда «Юйюрню къадары къыралны къадарында» деген кёрмючде республикада белгили адамланы юслеринден шартланы табаргъа боллукъду. «Мени гитче Ата журтум – Къабарты-Малкъар» деген бёлюм а эртте заманлада юйледе жюрютюлген затладан къуралгъанды. «Урушну тауушу» бёлюмде уа аскер сауутланы, Уллу Ата журт урушну жылларында кийилген энчи кийимлени, сурат материалланы да кёресе. Бюгюнлюкде бардырыла тургъан энчи аскер операциягъа къатышхан жигит жашларыбызгъа жораланнган бёлюм да барды. Аланы суратларын, кийимлеринде белгилени да кёрюрге боллукъду. Аланы СВО-дан къайтхан жашла эмда аланы ата-аналары келтиргендиле. Бу школну окъуучулары «Эльбрус» отряд бла къаты байламлыкъ жюрютедиле, анда къуллукъ этген жашла музейге кёп сейирлик затланы саугъа этгендиле. Окъуу юйню директоруну юйретиу иш жаны бла орунбасары Джаппуланы Джамиля музейни юсюнден хапарлай, алада кёп магъаналы тюбешиуле къуралгъанларын, алагъа къонакъгъа Къабарты-Малкъарда «Ата журтну къоруулаучулары» деген фондну регион бёлюмюню келечилери терк-терк келиучюлерин да айтханды. СВО-гъа къатышхан жигит жашларыбыз, аскерни ветеранлары да тамата классланы окъуучуларына кеслерини, жашау жолларыны, энчи аскер операциягъа къатышыргъа нек эмда къалай баргъанларыны, анда къалай уруш этгенлерини юслеринден да сейир хапарла айтадыла, дегенди. «Аллай тюбешиуле бек магъаналыдыла, сабийлени эслеринде иги кесекге дери къаладыла эмда жюреклерин къозгъамай къоймайдыла. Аланы кезиулеринде ветеранла школчулагъа патриот ниет не болгъанын ангылатадыла, Ата журтну сюерге, анга кертичи болургъа кереклисин ангылатадыла, СВО-гъа къатышхан аскерчилеге эс бурургъа, къолдан келген болушлукъну этерге чакъырадыла. Сабийлени письмолары окъуна да къаллай бир жылыулукъ, ышаныулукъ, алгъа итиниулюк бергенлерин эсгертедиле. Кеслери кёзлери бла кёргенни, сынагъанны айтыу жюрекни къозгъамай къоймайды»,- деп, Джаппуланы Джамиля 8-чи номерли орта школда окъугъан жашла бла къызла СВО-да къуллукъ этгенлеге кёп кере гуманитар болушлукъ жыйышдырып ашыргъанларын, аны юсюне уа ала кёп метрле бла къорууланыу аула да ишлеп жибергенлерин билдиргенди. Мен мектепде болгъанымда, уллу рамада сабийле, устазла да эшген къоруулаучу ау тургъанын кёреме. «Ол хазыр болгъанлай, энчи аскер операцияда къуллукъ этген аскерчилеге жиберилликди»,- дедиле манга.
Поделиться:
Читать также:
17.02.2025 - 18:16 →
Саусузлагъа – тынч амалла
17.02.2025 - 18:15 →
Сабийле тюз жолдан таймазча
17.02.2025 - 14:34 →
Сабийлени багъаргъа аламат онгла къуралгъандыла
17.02.2025 - 14:32 →
Ахшылыкъ бир заманда да унутулмайды
17.02.2025 - 14:32 →
Ётмек туурамчыкъ
|