Жашау жоругъу – бюгюн тамамланыллыкъ ишни тамблагъа къоймаБиттирланы Махмутну къызы Лолита Искусстволаны Шимал-Кавказ къырал институтуну «Кинону эмда телевиденияны режиссёру» бёлюмюн бошагъанды. Бюгюлюкде ол окъуу юйде ишлейди, жаш тёлю эмда информация политика бёлюмню специалистиди. Ол ийменчек къызды, аны юсюнден газетге жазарымы иги кесекге дери унамай тургъанды, бюгюн ол редакцияны къонагъыды. - Лолита, бу усталыкъны сайларгъа не зат кёллендиргенди? - Бир бек жаратхан кинофильмим. Ол заманда аны жаланда биринчи кесеги чыкъгъан эди, аны экинчи кесегин да ашыгъып сакълагъанма. Болсада ол иги кесек заманнга дери да чыкъмай тургъанды, мен а аллай бир заманны ичинде кесим да режиссёрлукъ ишге юйренир эдим, деген акъылгъа келеме.
- «Хрустальный корабль» деген анимация фильм эди. Анда сабийле кёкде учуп баргъан мияла кемеге олтуруп турадыла. Ала ары къалай тюшгенлерин ангыларгъа кюрешедиле. Ол жомакъдан алыннган хапар жашауну бла ёлюмню юсюнденди, кеси да артыкъ белгили болмагъан кельт таурухдан алыннганды. Анда ирландиялы жигит къызыл чачлы Коннулуну мёлеклени къыралына элтгенини юсюнден айтылады. Ары тюшген адамла къартаядыла, алай алагъа ёлюм жокъду. Биринчи эмда экинчи курслада окъугъанымда уа, мультипликация студияда волонтёрлукъ этип тургъанма, анда сайлагъанма тийишли техниканы да кесими проектиме. - Жаш тёлю политикагъа уа къалай келгенсе? - Ол жаны бла ишлегенли жылдан атлагъанды. Кесими бир жангычылыкъ затда сынап кёрюрге сюе эдим. Бу ишимде жаш адамлагъа кеслерин чыгъармачылыкъ хунерлерин ачыкъларгъа эмда ала проектлерин, башламчылыкъларын жашауда бардырырча этерге юйретеме, болушама. Олду мени борчум. Мен оюм этгенден, кёп жаш адам жангычылыкъларын айныта, кёргюзте билмейдиле, ийменнген этедиле. Аны кесим да сынагъанма, болушлукъ жетишмей, бек къыйналгъанма. Энди уа аллайлагъа болушама, таукеллендиреме. Насыпха, жаш адамланы араларында фахмулула кёпдюле, алагъа сен бу ишни къолгъа алсанг эди, десенг, угъай демейдиле. Дагъыда ала алгъа итинирге кюрешедиле, ачыкъдыла эмда жангычылыкъладан артха турмайдыла, бир бирлерин юйретирге да угъай демейдиле. - Ишингден ыразылыкъ табар, аны тынгылы бардырыр ючюн а не керекди? - Бек биринчи – кёл салсанг, ишинг къураллыкъды. Анам манга гитчелигимден окъуна да: «Бюгюн тамамларгъа боллукъ ишни тамблагъа къойма», - деп юйретгенди. Ол кеси да анга кертичи болгъанды. Бир-бирледе эринчеклик чырмаулукъ этеди, анга да къарамай, заманымы хайырлы ётдюрюрге итинеме. Бизни юйюбюзде жюрюген дагъыда бир магъаналы адет – хар жумушну да белгиленнген заманында тамамларгъа керекди. Анга кёре гитчелигимден бери да бир жерге да кечигип бармайма, жолгъа атланырыкъ болсам, бир кюн алгъа битеу керекли затларымы жыйышдырып салама. - Муратларынг да сенде, жаш адамда, кёп болурла? - Бек уллу муратым – жангы къыралланы кёрюрге, башхаланы адет-тёрелери бла шагъырейленирге. Мени биринчи уллу жолоучулугъум Кюнчыгъыш Азия бла байламлы боллукъду. Японияда эмда Кореяда болургъа, сакураны чакъгъанын кёрюрге сюеме. Азия акъылбалыкъ болгъан заманымдан бери да кесине тартады. Къытайлы фильмлени, японлу анимелени, Юг Кореяны культурасын да жаратама. Бусагъатда уа корейлилени тиллерине юйрене турама. Дагъыда бир муратым –Индий океанны шимал-кюнбатыш жанындагъы Сокотр айрыкамына барыуду. Ол а мени кесине аламат табийгъаты, битимлери, жерлери бла тартады. - Ишден бош заманынгы уа къалай ётдюресе? - Китап окъургъа, сурат ишлерге да сюеме. Ол затла манга харкюнлюк жумушладан солургъа болушадыла. Сурат алып школда окъугъанымда окъуна башлагъан эдим, студент жылларымда уа аны къолгъа алгъанма. Тюрлю-тюрлю конкурслагъа терк-терк къатышама. Алгъан суратларымы асламысы табийгъат бла байламлыдыла, алай адамланы суратларын да этеме. 2021 жылда Къарачай-Черкес Республиканы 100-жыллыгъына жораланнган «Туугъан республиканы бети» деген сурат конкурсда лауреат деген атха тийишли болгъанма. Ишлеримде Домбайны таулу жерлери Гумбаши ауушну да суратлары бар эдиле. Суратларымдан къуралгъан ишлерим 2022 жылда КъЧР-ни Курортла эмда туризм министерствосуну информация майданларында эмда орузламасында басмаланнгандыла. - Къаллай ишни да къолгъа алырдан алгъа план саламыса? Огъесе эсинге тюшгенними этесе? - Эсде болмай тургъанлай этилген оноула, ишле бютюн аламатдыла, мен аланы бегирек сюеме. Нек дегенде алгъадан план салып, аны сакълап туруу мени къыйнагъан этеди. Заманы жетгенде уа, экили болуп башлайма: этмейими, барайымы, къалайымы деп. Аны себепли келир заманнга планла салыргъа артыкъ бек сюймейме. - Кесинг фильм алыргъа уа сюемисе? - Аллай муратым да барды. Болсада диплом проектими бютюн иги, бютюн тап этерге кюреширикме. Биринчиден, 2Д-анимацияны алышындырыргъа сюеме. Кесим жаратханча, хар зат да тап болмагъанды, бютюнда техника жаны бла. Бусагъатда мен диплом ишими къоруулагъандача къоркъакъ тюйюлме, таукелме. Мультфильмге къаллай бир керек эсе да, аллай бир заманымы, кючюмю да берирге боллукъма.
Поделиться:
Читать также:
17.02.2025 - 18:16 →
Саусузлагъа – тынч амалла
17.02.2025 - 18:15 →
Сабийле тюз жолдан таймазча
17.02.2025 - 14:34 →
Сабийлени багъаргъа аламат онгла къуралгъандыла
17.02.2025 - 14:32 →
Ахшылыкъ бир заманда да унутулмайды
17.02.2025 - 14:32 →
Ётмек туурамчыкъ
|