Биринчи сабий туугъан юйюрлеге – тёлеуле

2024 жылда биринчи сабий туугъан неда сабийни алып ёсдюрген эки мингнге жууукъ юйюрге ай сайын тёлеуле этилип тургъандыла, ол муратлагъа эки жюз миллионнга жууукъ ахча бёлюннгенди. Болушлукъну бу тюрлюсю файдалары регионда адамгъа жашау этерге керекли ахчаны эм аз эки ёлчемине (36 036 сом) жетмеген юйюрлеге этилип тургъанды. Аны алыр ючюн заявитель, сабий да Россейни гражданлары болургъа эм дайым да къыралыбызда жашаргъа тийишли эдиле, тёлеуню тохташдыргъанда юйюрню битеулю мюлкю тергелмегенди.

Алай бла биринчи сабий ючюн жылны ичинде хар айдан 15 439 сом тёленнгенди, бу болжал бошалгъанлай, аны алыр ючюн жангыдан заявление жазаргъа керек болгъанды. Ол къабыл кёрюлсе, биринчи тёлеу беш ишчи кюнден кеч къалмай этилгенди, андан сора айлада уа - хар ючюнчю кюн. Бу тёлеу бла бирге бир пособие да алынмагъанына эс бурургъа тийишлиди. Бютюн толу информацияны 8-800-200-06-70 телефоннга сёлешип алыргъа боллукъду, ол хакъсызды. Социал фондну жангылыкълары аны социал сетьледе каналларында да бериледиле.

Кульчаланы Зульфия.
Поделиться: