Кёп сабийли юйюрлеге болушлукъну «алтын низамы» хазырланнгандыБылтыр «Единая Россияны» кёргюзтюую бла кёп сабийли юйюрлеге къырал себепликге бурулгъан 50 закон къабыл кёрюлгенди. Аны юсюнден партияны генсоветини жууаплы комиссиясыны жыйылыуунда айтылгъанды. Кенгешде партия сабийлери болгъан юйюрлеге къыралны жанындан болушлукъ жаны бла къаллай жумушла толтургъаныны эсеплери чыгъарылгъандыла эмда келир кезиуге муратла сюзюлгендиле. - Партияны халкъ программасына юйюрлеге болушлукъну жангы мадарлары кийирилгендиле. Аладан бирлери Россейни Президентини юйюр политиканы айнытыу жаны бла буйрукъларыны чеклеринде бардырыладыла. Аланы арасында энчи аскер операциягъа къатышханланы сабийлерине къайгъырыулукъ баш магъананы тутады. Сёз аланы сабий садлада, школлада окъутууну, профессионал билим алгъанда себепликни юслеринден барады,-дегенди генсоветни секретары Владимир Якушев. Ол айтханыча, башха башламчылыкъла да сюзюледиле. Ол санда студент юйюр деген даража кийирилликди. Ол жаны бла законну проекти биринчи окъулууда къабыл кёрюлгенди. «Вузлада сабийлеге отоула къуралырча мадарла этилликдиле. Регионлада ол жаны бла сынау барды, аны башха жерледе сингдирирге тийишлиди. Юйюр ипотека программа жашауда къалай бардырылгъанына къаралгъанлай турлукъду. Президент андан тыйгъычланы кетерирге буйрукъ бергенди,-деп къошханды Владимир Якушев. Генсоветни комиссиясыны таматасы, Къырал Думаны башчысыны орунбасары Анна Кузнецова билдиргенича, былтыр партияны депутатларыны башламчылыкълары бла юйюр бла байламлы 50 закон жарашдырылып, къабыл кёрюлгенди. - Эки эм андан кёп сабий ёсген юйюрлеге болушлукъну жангы амаллары тохташдырылгъандыла. Налог вычет эки кереге кёбейтилгенди. СВО-гъа къатышханланы юйюрюнде сакъат сабий бар эсе, жашау журт болжалдан алгъа бериледи. Сабийлени къоркъуусузлукъларын сакълауну юсюнден айтханда, алагъа никотини болгъан затланы сатыу-алыугъа жууаплылыкъ къатыланнганды. Электрон тютюнлени, тютюнлени акъылбалыкъ болмагъаннга къайтарып сатханнга уголовный жууаплылыкъ кийирилгенди. Энтта жюз башламчылыкъ сюзюле турадыла,-дегенди Анна Кузнецова. РФ-ни Президенти «Единая Россияны» кёп сабийли юйюрлеге федерал даража бериуню юсюнден башламчылыгъын тюзге санагъанын айтырчады. - Комиссия уа кёп сабийли юйюрлеге себепликни «алтын низамын» хазырлагъанды. Бу жаны бла иш 70 регионда къалай бардырылгъанын сюзгенбиз. Алчыланы санына Липецк эм Ленинград областьла чыкъгъандыла, алада бизни комиссия хазырлагъан мадарла барысы да тамамланадыла, экинчи жерге Москва бла Санкт-Петербург чыкъгъандыла, аланы ызларындан Свердлов, Ульяновск, Мурманск, Сахалин, Тульск, Ростов, Ярослав областьла, Коми, Калмыкия, Къабарты-Малкъар эм башха регионла келедиле,-деп белгилегенди ол. Федерал даражада кёп сабийли юйюрлеге болушлукъну мадарлары андан ары бардырыладыла. Анна Кузнецова айтханыча, болушлукъну тохташдыргъан кезиуде излемле женгиллетилликдиле, СВО-гъа къатышханланы юйюрлерине берилген болушлукъну регион мадарлары да бир низамгъа келтирилликдиле. Артыкъда суралгъан амалланы юсюнден айта, сабийлени солууларын къураугъа, саулукъларына багъыугъа, сабий садлада тёлеуледен эркин этиуге сурам уллу болгъанын чертгенди ол. Болсада аланы кенгертирге белгиленнгенин да айтханды. KABARDIN-BALKAR.ER.RU сайтны журналистлерини сорууларына жууапла бере, «Кючлю юйюр» партия проектни регионда бардырыугъа жууаплы Елена Романова Къабарты-Малкъарда юйюрлеге болушлукъну системасы къуралгъанын чертгенди. Ол билдиргенича, КъМР-ни къырал программаларыны чеклеринде бешинчи эм андан кёп сабий туугъанда, юйюрге регион аналыкъ капитал тёленеди, неда жашау болумну игилендирирге болушлукъ этилирге да болады. КъМР-де «Ана махтаулукъ» майдал да бериледи. Аны бла бирге сабийлеге тёлеуле этиледиле. 2024 жылда аллай болушлукъну 20 ана алгъанды. Бир тиширыугъа уа микроавтобус берилгенди. - Сабийлени солууларын къурау эм саулукъларын игилендириу жумушланы чеклеринде былтыр 7,1 минг сабийге себеплик этилгенди. Аладан 3 минги кёп сабийли эм къыйын жашау болумгъа тюшген юйюрледендиле. Алагъа солуу учреждениялагъа путёвкала хакъсыз берилгендиле. Энчи аскер операциягъа къатышханланы 269 сабийи да солутулгъандыла. Юйюрлеге къырал себепликни мадарлары андан ары бардырыллыкъдыла,-дегенди Елена Романова.
Поделиться:
Читать также:
13.02.2025 - 14:26 →
Казбек Коков жаш тёлю къымылдауну башчылары бла тюбешгенди
30.01.2025 - 15:57 →
КЪАБАРТЫ-МАЛКЪАР РЕСПУБЛИКАНЫ БАШЧЫСЫНЫ УКАЗЫ
30.01.2025 - 15:53 →
КЪАБАРТЫ-МАЛКЪАР РЕСПУБЛИКАНЫ БАШЧЫСЫНЫ УКАЗЫ
27.01.2025 - 12:27 →
«Ленинградны жигитлерине - ёмюрлюк махтау!
25.01.2025 - 08:39 →
«Муратланы толтурур ючюн битеу кючюбюзню салып урунургъа керекбиз»
|