Сыйлы донорланы санына къошулгъанды

Кёп болмай Федерал медицина-биология агентствону  (ФМБА) донорлукъ къымылдауун  айнытыугъа уллу къыйын салгъанлары ючюн,  Нальчикни Къан къуйгъан станциясында  онбеш жерлешибизни  къууанч халда   саугъалагъандыла.  Алагъа «Россейни  сыйлы донору» деген  белгиле   эм  Бахсанны 3-чю номерли школуну гитче классларыны  окъуучуларыны алгъышлау письмолары  да берилгендиле.   Андан сора да, Бахсандан гитче классланы устазы   Виктория Хажметова  «Донорлукъ къымылдаугъа билеклик этгени ючюн»  майдалгъа тийишли болгъанды.

Ол кюн КъМР-ни саулукъ сакълау министрини орунбасары Заурбек Батыров,
донорлагъа бла станцияны келечилерине ыразылыгъын билдире, " Бу даражалы саугъагъа тийишли болгъаныгъыз бла жюрекден  алгъышлайма. Уллу кёллю болмагъаныгъыз, тирилигигиз эм  жандауурлукъ халда болушургъа итиннгенигиз бирсилеге юлгю болурчады,"- деп къошханды ол.

Ахырында гитче классланы  окъуучуларына «донорну жолуна сегиз атлам» деген чакъырымны чеклеринде Къан къуйгъан станцияны иши бла шагъырейлендирирча  экскурсия бардыргъандыла эм аны магъанасын да ангылатхандыла.  

 Эсге сала айтсакъ, "Россейни сыйлы донору" атха тийишли болурча, эм азындан, хакъсыз  эки жыйырма кере донор болургъа керекди. Бюгюнлюкде Къабарты-Малкъарда бу  сыйлы атны  900 жууукъ инсан жюрютеди.  
 

Поделиться: