Шуёхлукъну байрамы

Къабарты-Малкъар къырал университетни тыш къыраллы студентлери «Евразияны фахмулары» деген тогъузунчу халкъла аралы эришиуге къатышхандыла. Конкурс Къулий Къайсын атлы Малкъар  къырал драма театрда бардырылгъанды. Аны Россейни Культура эм Билим бериу министерстволары, Россейни халкъларалы ассамблеясы, Россейни хореографларыны профессионал биригиую, Дуния артий комитет, Евразиялы континентли артий комитет къурагъан эдиле.

Тепсеу ансамбльле, жырчыла, халкъ инструментлени оркестрлери Россейни кёп регионларындан келгендиле.

Бу жарыкъ байрам эм фахмулуланы ачыкълагъандан сора да, студентлени араларында шуёхлукъну кючлендирир мурат бла къуралгъанды. Устазла бир бирлерини сынамлары бла шагъырей болгъандыла, жаш адамла уа чыгъармачылыкъ жаны бла  кёп жангы зат  билгендиле. 

КъМКъУ-ну халкъла аралы билим бериуню бийик школуну студентлери кураторлары Елена Шериеваны башчылыгъы бла конкурсда «вокал» эм «хореография» бёлюмледе  усталыкъларын кёргюзтгендиле. 

Эришиу Россейни маданият эм жамауат жашауунда бек магъаналы иш болгъанды.