ФСБ: Сакъ болугъуз: аманлыкъчыла не тюрлю амалланы да хайырланадыла

Россейни ФСБ-сыны телефон номерлерине келишген жалгъан номерлени хайырлана, аманлыкъчыла арт кезиуде адамланы счётларындан ахчаларын урлау бла кюрешедиле. Къоркъуусузлукъну жалчытыу органладан сёлешгенча этип, ала гражданланы алдап, счётларында болгъан ахчаларын «къоркъуусуз» счётлагъа ётдюрюрча неда кеслери алларына банкдан алып ала айтхан счётлагъа ашырырча ийнандырадыла. Бир бирде уа курьерлени ашырып, адамла кеси ыразылыкълары бла берип иерча да къурайдыла ишлерин.

Дагъыда аманлыкъчыла адамланы аланы юйюрлерини келечилерине «ачылгъан» уголовный ишлени жабар ючюн да ахча излейдиле. Жарсыугъа, кёпле алагъа ийнанадыла.

Битеу бу ишлени бардыра, ала жалгъан служебный удостоверенияланы суратларын неда тюрлю-тюрлю ётюрюк приказланы кёргюзтедиле. Сора аланы айтханларына ийнанмагъанланы уа ала уголовный жууаплылыкъгъа тартыу бла къоркъутадыла.

Аны себепли гражданланы эслерине энтта да бир кере салыргъа сюебиз уголовный иш ачылгъанда, органла билдириу письмо ашырадыла эм аны ол адамны кесини къолуна тутдурадыла. ФСБ-ны къуллукъчулары гражданла бла байламлыкъ тохташдырыуда социальный сетьлени бла месенджерлени хайырланмайдыла, энчи удостоверенияларыны суратларын, ведомстволу приказланы да копияларын ашырмайдыла.   

Къоркъуусузлукъну жалчытхан органланы жамауат приёмныйлерини телефонлары гражданладан бла организацияладан билдириулеге ишлейдиле. Сиз дагъыда ол номерлеге сёлешип, аманлыкъчыла органланы келечилери болмагъанларына тюшюнюрге боллукъсуз. 

Сёлешген адам ушакъны кезиуюнде «ФСБ», «МВД», «Следстволу комитет», «Банкны къоркъуусузлугъун жалчытыу комитетни келечиси», «Россейни Ара банкыны бирикдирилген расчёт арасы», «Сизни инсанлыкъ борчугъуз» деген сёзлени хайырлана эсе неда паспортугъузну, СНИЛС-ни номерин, банк картагъызны номерин сурай эсе, жашау журтугъузну сатаргъа чакъыра эсе - мычымай телефонну салып къоюгъуз. Аны ючюн закон бла сизни бир адам да не административ, не уголовный жууаплылыкъгъа тарталлыкъ тюйюлдю.

Андан сора да, шёндюгю технологияланы хайырлана, аманлыкъчыла ауазларын сизни жууукъ-ахлуларыгъызгъа ушатып да сёлеширге неда билдириу ашырыргъа боллукъдула. Анга энчи эс бёлюгюз. Дагъыда шуёхларыгъызны бла танышларыгъызны атларындан ахча тилей жазсала, ол адамланы кеслерине сёлешип сормай, зат ашырмагъыз.

 Бюгюнлюкде бизни къыралгъа къаршчы тургъан къыралланы, ол санда Украинаны да, энчи службалары россейлилени аманлыкъчылыкъгъа тартыу жаны бла уллу иш бардырадыла. Бирлеге ахча берирге айтадыла, экинчилерин къоркъутуп, тюрлю-тюрлю объектлеге заран салырча юйретедиле. Аскер транспортха, социальный инфраструктурагъа хата келтирирге юйретедиле, бир-бирледен жандауурлукъгъа деп ахча аладыла. Артда ачыкъланнганларына кёре уа, битеу ол ахча ВСУ-гъа болушлукъ тапдыргъан организацияланы счётларына тюшеди.

Алайды да, билмеген адамларыгъыз бла ушакъла бардырмагъыз. Кесигизни, жууукъларыгъызны да аманлыкъчыладан сакъларгъа кюрешигиз.