Газет - къыраллыгъыбызны бир белгиси

Газетибизни бетлерин окъуулу этиу, аны тиражын сакълау эм айнытыу не заманда да анда ишлегенлени баш борчларындан бири болгъанлай къалады. Бюгюнлюкде да ол жумушну бизден бир киши эркин этмегенди, коллектив аны магъанасын кимден да иги ангылайды эмда аны тамамларгъа кюн сайын башын ёрге кётюрмей ишлейди. Не десек да, «Заман» газет малкъар халкъны къыраллыгъыны бир магъаналы белгисиди. Ол маданият хазнабызны, миллет тарыхыбызны сау ёмюрню зарфха салгъанлай келеди. Электрон амал бла да ыйыкъгъа беш кере чыгъабыз, аны хайырындан башха шахарлада, тыш къыраллада жашагъан жерлешлерибиз да сайтда материалланы сюйюп окъуйдула.

Энди уа, тёреде болуучусуча, келир жылны биринчи жарымына газетге жазылыу кампанияны къалай бардыргъаныбызгъа къарайыкъ. Бу жол тиражыбыз 1717 экземпляр болгъанды. Бирси республикалы изданияла «Кабардино-Балкарская правда» (1753), «Адыгэ псалъэ» (1254) бла тенглешдиргенде,  кёрюмдюлерибиз игидиле деп айтыргъа боллукъду.    

Жазылыу кампаниягъа окъуучуларыбыз къалай къатышханларына къарасакъ, эм уллу кёрюмдюню Тырныауузну почта бёлюмю бергенди. Анда 239 инсан жазылгъанды газетге.  Нальчикни тийресинде болгъан 19 почта бёлюмю да 194 экземпляр къошханды тиражыбызгъа.  Белгилерчады, Хасанияда бу жол газетибизни- 215, Кёнделенде - 138, Огъары Малкъарда уа 83 юйюр аллыкъдыла.      

Къалгъан эллерибизни юсюнден айтханда, хал былайды:  Къашхатау-137, Бабугент-108,  Яникой-69, Булунгу-61, Герпегеж -53, Акъ-Суу- 31, Ташлы-Тала-42,  Тёбен Чегем-36,  Лашкута-29, Быллым-27, Хушто-Сырт-25, Хабаз-21, Элбрус-20, Жангы Малкъар-18, Жанхотия-19, Кичибалыкъ-18, Къара-Суу-11, Огъары Бахсан -3, Бызынгы-12, Огъары Жемтала-13, Бедик-8, Биринчи Чегем эм Экинчи Чегем-13,  Кенже-13, Шалушка-11. Бир-бир элледе экишер, ючюшер, тёртюшер  адам жазылгъандыла газетге.

Саулай да озгъан кезиуден тиражыбыз 10 экземпляргъа асламды.   Тырныауузну, Къашхатауну, Огъары Малкъарны, Бабугентни, Кёнделенни, Хасанияны почта бёлюмлеринде ишлегенлеге ыразылыгъыбызны билдирирге сюебиз. Тырныауузну бла Къашхатауну почта бёлюмлерини  таматалары Афашокъаланы  Руслан бла Гажонланы Асият да тиражыбызны санын сакъларгъа эм аны ёсерине хар кезиуде уллу къыйын саладыла. Ала ол ишни таза жюреклеринден, миллет газетни энчилигин эм магъаналылыгъын билип бардырадыла, окъуучуларыбызгъа да ангылатадыла.

Адам санлары аз, алай кёрюмдюлери иги болгъан Герпегежни, Ташлы-Таланы эм Булунгуну почталарында ишлегенлени-Бёзюланы Аминатны, Таукенланы Сакинатны, Акъайланы Фатиматны жазылыу ишге салгъан къыйынларын энчи белгилерчады.  

Кёрюмдюлеге кёре, жазылыу кампания хар жерде бирча бардырылмайды. Элледе да почта бирча иги ишлемейди. Аны юсюнден Россейни почтасыны КъМР-де таматасына Заур Вороковха билдиргенбиз, болумну тюзетирча мадарла этиледиле, дегенди ол баш редакторла бла болгъан жыйылыуда.

Окъуучула бла байламлыкъны юзмей,  газетде ишлеген белгили журналистле Мусукаланы Сакинат, Тикаланы Фатимат, Холаланы Марзият, Улбашланы Мурат, Таппасханланы Аминат, Темуккуланы Асият  бла Аминат, Османланы Хыйса, Курданланы Сюлемен эм башхала эллеге жюрюйдюле, окъуучуларыбыз бла тюбешиуле бардырадыла. Кёп сабийли юйюрлени,  къол усталаны, иш къурап баш кечиндиргенлени, жер -жерли администрацияланы, устазланы, жаш тёлюбюзню юсюнден  материалла хазырлайдыла. Эллерибизде жашайдыла бизни окъуучуларыбызны асламысы, аладыла газетни бетлерини жигитлери.  

Энди жазылыу кампаниягъа себеплик этгенлени бир къауумуну атларын сагъыныуну тийишли кёребиз.  КъМР-де Адамны эркинликлери жаны бла уполномоченный Зумакъулланы Борис, КъМР-де сюд  приставланы федерал службасыны управлениясыны таматасы-республикада баш сюд пристав Бауаланы Ахмат,  Черек районну администрациясыны таматасы Къулбайланы  Алан эм аны кенгешчиси Байсыланы Харун, жамауатчы Улбашланы Келлет, Элбрус  районну администрациясыны башчысыны къуллугъун толтургъан Отарланы Мухтар,  Черек, Чегем эм Элбрус районлада электросетьлени таматалары Жангоразланы Хасан, Жаболаны Марат эм Хапаланы Юсюп, Элбрус районну Халкъны социал жаны бла жалчытыу комплексли арасыны директору Этезланы Мажит, Элбрус районну Социал жаны бла къоруулау эм иш бла жалчытыу арасыны таматасы Мырзаланы Замрат, «Гипсолит» биригиуню таматасы Тохаланы Хыйса эм башхала.                                                    

Жамауат ишге тири къатышхан жашыбыз Тетууланы Хадис,  социал сетьледе жазылыу кампанияны баргъаныны юсюнден жамауатха билдирип, аны кёрюмдюлери иги боллугъуна ахшы себеплик этгенди. Миллетни иши бла байламлы соруулагъа халкъ уллу кёллю болмазгъа кереклисин энчи чертгенди басмалагъан чакъырыуунда.  Башда сагъынылгъанлагъа редакцияда ишлегенлени, кесими атымдан да жюрек ыразылыгъымы билдирирге сюеме.

Газетни окъуучуларына уа быйылгъы жыл да «Заман» сизни керти шуёхугъуз, огъурлу сёз нёгеригиз болур деп ышанама. Жангы жыл а   халкъыбызгъа, республикабызгъа, саулай къыралыбызгъа да насып, монглукъ эм дуния ырахатлыкъны келтирсин.