Хорлагъанлагъа – къошакъ онгла

Озгъан жылны ахыр кюнлерини биринде  Къабарты-Малкъар къырал университетде  школчуланы эмда бийик окъуу юйлени биринчи  курсларыны студентлерини араларында республикалы  олимпиада бардырылгъанды. Аны жалгъан интеллект эмда  цифралы технологияла  институтну компьютер технологияла  эмда  информация къоркъуусузлукъ жаны бла  кафедрасы къурагъан эди.

Бу кюнледе уа  олимпиадада хорлагъанланы эмда экинчи, ючюнчю жерлеге тийишли болгъанланы саугъалау бардырылгъанды. Хычыуун жумуш башланырдан алгъа, институтну деканы профессор Татьяна Хаширова студентлени, окъуучуланы да жетишимлери бла  къызыу алгъышлагъанды, быйыл школну бошап чыгъарыкъ жашланы бла къызланы  КъМКъУ-ну ол башчылыкъ этген институтунда окъургъа чакъыргъанды. 

-Олимпиада бу жол бла  тогъузунчу кере бардырылады. Бюгюнлюкде  бу окъуу юйде билим ала тургъан  кёп жаш, къыз да университетге жолларын  быллай олимпиадаладан башлагъандыла. Ала бизни бек иги студентлерибиздиле, деп таукел айтыргъа боллукъма. Энди аланы араларында магистратураны  бошап, андан ары билимлерин ёсдюргенле да  кёпдюле. Биз аллай жаш адамларыбыз бла ёхтемленебиз,- дегенди  Татьяна Юрьевна.

КъМКъУ-ну бёлюмюню таматасы,  социология илмуланы кандидаты  Виндижева Альбина да хорлагъанланы университетни оноучуларыны атындан  алгъышлагъанды. Школну бошагъан  жаш адамла  КъМКъУ-ну сайласала сокъуранмазлыкъларына да ышандыргъанды, ата-аналагъа да  быллай  сабийле ёсдюргенлери ючюн ыспас этгенди. Бу жетишим  жаш адамланы алгъа итинирге, айныргъа да кёллендирлигине ишексиз болгъанын айтханды.

Андан сора  биринчи, экинчи, ючюнчю жерлеге  чыкъгъан жашлагъа бла къызлагъа саугъала, грамотала да берилгендиле. Школну быйыл бошарыкъла  алгъан грамотала  КъМКъУ-ну башда айтылгъан институтуна кирирге  ыразылыкълары болгъанлагъа ЕГЭ-леде алгъан балларына дагъыда беш балл къошады.

Хорлам болдургъанланы араларында Нальчикде  1-чи номерли билим бериу араны 11-чи классыны окъуучусу  Холаланы Хаджи-Мурат, Хасания элде 16-чы номерли орта школну 5-чи эмда 8-чи классларыны окъуучулары Къазакъланы  Надия бла аны къарындашы  да бардыла.