Тиширыулагъа махтау сала

Республиканы ара шахары Нальчикни  300-жыллыгъына жоралап, Дуния Артий комитетни  Шимал Кавказда бёлюмю уллу байрам къурагъанды. Уллу залда  олтуруп угъай да сюелип турургъа да жер жокъду.  Байрам кеси да жарыкъды, саугъалыды. Ингирде тюрлю –тюрлю  усталыкълада, къуллукълада ишлеген, кюн сайын да Россейни, республиканы, шахарны  айнытыугъа къыйынларын салгъанланы белгилейдиле. Ала «Нальчикге - 300 жыл» деген жазыуу болгъан  алтын майдал эмда диплом бла саугъаланадыла.

Къууанчлы ингирни ача, аны къурагъан Дуния Артий комитетни  Шимал Кавказда бёлюмюню башчысы, профессор Ауэс Бетуганов былай дегенди: «Нальчик – Шимал Кавказда политика,  экономика эмда  культура  арады,  аны жашил къудуретге батып тургъан курорту да Битеуроссей магъананы тутады, Нальчик а  Россейни эм тап ишленнген  шахарларыны санына киреди. Кеси да кюнден-кюннге жангыра, ариудан-ариу бола барады. Тарых магъаналы документле шагъатлыкъ этгеннге кёре, ол 1724 жылда къуралгъанды. Артий комитет да бу магъаналы юбилейге эс бурмай къоярыкъ тюйюл эди. Ма аны себепли бюгюннгю ингирибиз да ол юбилейге  жораланады. Черте кетерге  тийишли кёреме: бу майдалла аз санда чыгъарылгъандыла. Ала жаланда жюздюле»,-дегенди  Ауэс Абуевич.

-Керти да Дуния Артий комитет бизге бюгюн байрам саугъа этгенди. Бери келген ким да шахарыбыз кюнден-кюннге айный, жашил, ариу бола барырын, айнырын  сюйген адамладыла. Алай  шахарны къурагъанланы,  аны  кюн сайын да  ариу эте баргъанланы да атларын унутургъа жарамаз. Алагъа да  сау болугъуз дерге эмда бюгюнлюкде кеслерини тийишли юлюшлерин къоша, ишлери бла  шахарны бютюн айбат эте баргъанла да ыспасха тийишлидиле,-дегенди  КъМР-ни Парламентинде  Коммунист партияны башчысы Борис  Паштов. 

 Профсоюзланы культурада ишлегенлерини бёлюмюню башчысы Марьяна  Даова уа   республикадан,  аны шахарларындан, районларындан да   атлары айтылгъан кёп  адамла чыкъгъанларын, ала кюн сайын да тамамлагъан  ишлери бла Нальчикни, республиканы атын  махтау бла айтдырып келгенлерин  уллу ёхтемлик бла чертгенди. «Таулу тиширыуну юсюнден  бизни белгили поэтлерибиз Къулийланы Къайсын, Алим Кешоков да  кёп ариу назмула жазгъандыла. Бизни тиширыулагъа битеу дунияны тиширыулары сукъланадыла.  Алгъаракълада биз белгили жерлешибиз, айтхылыкъ поэтибиз Зумакъулланы Танзиляны 90-жыллыкъ юбилейин къууанчлы халда белгилегенбизни да  айтмай кетерге сюймейме. Аны алгъышларгъа  кёп жерледен кёпле келгендиле. Ол а тюйюлмюдю бизни тиширыулагъа этилген хурмет. Ма аллай аламат адамланы жаратханды республикабызны жери»,- дегенди Марьяна Патовна.

Андан сора хычыуун жумуш да башланнганды. Башда айтханыбызча, айырмалылагъа  майдалла, дипломла, гюлле да берилгендиле. Аланы араларында: зоопаркны директору Забакъланы Залим, «Маяк» санаторийни директору Мамайланы Айшат, предприниматель Сардианланы Хусей, «Заман» газетни бёлюмюню редактору Османланы Хыйса, КъМР-де  спортну ветеранларыны советини председатели Уяналаны  Владимир, «Заман» газетни корреспонденти Холаланы Марзият,  Къулийланы Къайсын атлы Малкъар драма театрны  артисткасы Алтууланы Халимат,  «Кюнлю шахар» академияны директоруну биринчи орунбасары Джаппуланы Тамара, энчи аскер операциягъа къатышхан Гелястанланы Аслан, республикада белгили жырчы Бийланы Аслан, дагъыда башхала да бардыла.

Саугъаланнганланы ариу жырлары, тепсеулери бла уа  кёллерин жырчыла  Ирина Даурова, Джульетта Мезова, Чабдарланы Алёна, Бийланы Аслан, Черим Нахушев, Эльдар Дымов, Алим Карданов, Милана Вологирова, Культура колледжни преподаватели Ирина Даурованы  студентлеринден къуралгъан «305» къауум,  «Карагач», «Кишпек»  сабий тепсеу ансамбльле, КъМКъУ-ну «Калисто»,  «Терк къазакъла» академиялы  ансамбль  да кётюргендиле.