Жетишим

Къабарты-Малкъарны Спорт министерствосунда дзюдодан республикалы федерацияны ишини эсеплери чыгъарылгъандыла. Аны бла байламлы болгъан жыйылыугъа ведомствону башчысы Ислам Хасанов, федерацияны таматасы Нурмухамед Емкужев, Олимпиаданы чемпиону Беслан Мудранов, Россейни дзюдодан жыйымдыкъ къауумуну тамата тренерлери Мурат Шадов бла Мурат Хабачиров, Дзюдодан бла самбодан Олимпиада резервли спорт школну башчысы Олег Саральпов, «Локодзюдо» клубну башчысы Залим Гаданов къатышхандыла.  

Дзюдо регионда спортну айныгъан, федерал ведомство жарашдыргъан тизмеге кирген тюрлюсюдю. Ол себепден анга власть органланы, жамауатны жанындан да сейир уллуду, спортчула кеслери да жетишимлери бла дайым къууандыргъанлай турадыла. Билдирилгенича, федерация жылны ичинде отуздан аслам эришиу, тёрт юйрениу-жарау этиу жыйылыу къурагъанды, дзюдочуларыбыз къыралда, андан тышында да къарыуларын сынагъандыла. Онсегиз гёжефибиз къыралны миллет жыйымдыкъ къауумуна киргендиле, алда аланы магъаналы эришиуле сакълайдыла. 

Спортчуланы Олимпиаданы чемпиону Беслан Мудранов алгъышлагъанды. «Не уллу, не даражалы эришиулеге да сизнича инсанла тюшедиле, хорламны уа итиниулюгю эм уллу болгъан алады. Республикабыздан беш адам къыралны жыйымдыкъ къауумуну тренерлери болуп ишлейдиле. Сиз айнырча, салгъан муратларыгъызгъа жетерча биз къолдан келгенни аярыкъ тюйюлбюз», - дегенди ол. 

Спорт министр Ислам Хасанов а спортчулагъа бла тренерлеге кёл салып ишлегенлери, жетишимлери ючюн ыразылыгъын билдиргенди, келир жыл да кёп хорлам келтиририн тежегенди. Ахырында къыралны жыйымдыкъ къауумуна кирген дзюдочулагъа бла самбочулагъа саугъагъа спорт кийимле берилгендиле.      
Кульчаланы Зульфия.