Алтын тауукъла табийгъатха жиберилгендиле

Къабарты-Малкъарны Табийгъат байлыкъла эмда экология министерствосу Къызыл китапха кийирилген элли алтын тауукъну эркинликге жибергенди. Ала табийгъатда къанатлыланы бу тюрлюлерини санын кёбейтир муратда энчи болумлада ёсдюрюлгендиле. 

Огъурлу жумуш Май районда тамамланылгъанды, къанатлыланы агъачны тийресинде жибергендиле, мында алагъа керекли къара кёкен ёседи, узакъ болмай суу да барады. Къара кёкенни жемишлерин Шимал Кавказда жашагъан алтын тауукъла бек сюедиле, былайда ёсген жабышмакъ кёкенни  бла къасмакъны  да жаратадыла. Къанатлыланы табийгъатха жиберирге районну администрациясыны башчысы Татьяна Саенко атасы - уучу эм чабакъчы Виктор бла келгенди, республиканы жаныуарла хазнасын бу жерледен байыкъландырып нек башлагъанларын да айтханды. «Алтын тауукъ районубузну байрагъында бла белгисинде суратланыпды, ол ариулукъну бла азатлыкъгъа итиниуню ышаныды. Ала уа кёп миллетли къыралыбызны шартларыдыла. Бу сейирлик къанатлыла уа энди муниципалитетибизни табийгъатына къошуллукъдула», - дегенди ол.

Илмуланы россейли академиясыны тау жерлени экологиясын тинтген институтуну башчысы Фатимат Темботова чертгенича, алтын тауукъла тюзледе бла таулагъа жууукъ жерледе жашайдыла, Май район да аны ючюн алагъа аламат тап келишеди. Фатимат Темботова кеси да эки минг онсегизинчи жылда кавказ алтын тауукъланы Къызыл китапха кийирирге къошумчулукъ этген инсанладанды.

Законодательствогъа тийишлиликде, китап хар он жылдан жангыртылады. Бюгюнлюкде республикабызда анга дагъыда элли эки жаныуар жазылгъандыла, ала барысы да жокъ болургъа жетип турадыла.   Табийгъат байлыкъла эмда экология жаны бла министрни орунбасары Аслангери Табухов Къызыл китап кезиулю кере чыгъарына алтын тауукъла анга кийирилмезлерине, алагъа къоркъуу кетерине ышаннганын билдиргенди. «Битеу бу иш да ол мурат бла толтурулады. Быйыл табийгъатха беш жюзге жууукъ къанатлы жиберилгендиле, эки минг отузунчу жылгъа ол тарихни беш мингнге жетдирирге белгиленеди», - деп билдиргенди. 

Ахыр беш-алты жылны ичинде бу жаны бла алгъа атламла этилгендиле, бюгюнлюкде алтын тауукъланы саны он мингнге жетеди, ала барысы да табийгъатдадыла. Ары дери уа ала Нальчикни уучу мюлкюнде ёсдюрюлгендиле. Учрежденияны башчысы Мурат Шаов эсгертгенича, быйыл табийгъатха дагъыда жюз бла сексеннге жууукъ къанатлы жиберилликдиле.