Казбек Коков КъМР-ни Правительствосуну Председатели бла тюбешгенди

КъМР-ни Башчысы Казбек Коков  республиканы Правительствосуну Председатели Мусукланы Алий бла ишчи тюбешиу бардыргъанды, аны кезиуюнде январьда толтуруллукъ борчланы юсюнден соруула сюзюлгендиле.   

Жууукъ кезиуде Уллу Ата журт урушда болдургъан Хорламны 80-жыллыгъын белгилерге хазырланыу бла байламлы Къурау комитетни жыйылыуу боллукъду.

 «Ол магъаналы байрамны белгилерге бизни Президентибиз Владимир Путин уллу магъана береди. Аны бла байламлы ол 2025 жылны Ата журтну къоруулаучуну жылы деп белгилерге буюургъанды. Бек ышанама, ол магъаналы жумуш бла байламлы ишлени бийик даражада бардырлыгъыбызгъа»,- деп чертгенди Казбек Коков.

Андан сора да КъМР-ни Башчысында ниет хазнабызны байлыгъын сакълау эм айнытыу бла байламлы советни жыйылыуу боллукъду. Анда Уллу Ата журт урушну кезиуюнде эм андан сора заманлада аскер эм урунуу жаны бла битеу къыралда болдургъан жетишимлени унутмау бла байламлы соруулагъа къараллыкъды. 

Тюбешиуде Президентибизни башламчылыгъы бла башланнган жангы миллет проектлени бардырыу бла байламлы соруулагъа да аслам эс бурулгъанды. РФ-ни Правительствосуну Председатели Михаил Мишустинни буюурууу бла республика ол ишге жангы жылны биринчи ишчи кюнлеринден тебиреп тири ишлеп башларыкъды. Мусукланы Алий билдиргеннге кёре,  миллет проектле бла байламлы федерал ара бла байламлыкъда регион проектле къураладыла эм аланы толтуруу бла тийишли келишимле этиледиле.  Муратларыбыз биягъыча жангы мектеплени, сабий садланы, медицина эм спорт мекямланы, жолланы, жашау журтланы ишлеу эм тынгылы ремонт этиудю. Андан сора да коммунал инфраструктураны жангыртыргъа да уллу эс буруллукъду.

Жууукъ кезиуде КъМР-ни Башчысында боллукъ жыйылыуда стратегиялы айнытыугъа эм миллет проектлеге къарау бла байламлы тийишли министерстволаны бла муниципал администрацияланы таматалары бла иш къалай бардырыллыгъыны юсюнден тынгылы оноу этилликди. Андан сора уллу жангы социал учрежденияланы Биринчи поликлиниканы бла Жаш тёлюню чыгъармачылыкъ мекямлары бла байламлы къурау структураларына къарагъандыла, деп билдиреди КъМР-ни Башчысыны бла Правительствосуну пресс-службасы.