Казбек Коков школ олимпиадалада хорлагъанла бла тюбешгенди

КъМР-ни Башчысы Казбек Коков окъуучуланы араларында бардырылгъан олимпиадалада хорлагъанала эм алчы жерлени алгъанла бла тюбешгенди. Ала школчуланы араларында бардырылгъан битеуроссей олимпиадалада, спорт эришиуледе эм тюрлю-тюрлю конкурслада хорлагъанла болгъандыла. Правительствону юйюнде жюзден аслам жаш бла къыз жыйылгъандыла. 

Республиканы Башчысыны къонакъларыны араларында энчи аскер операциягъа къатышханланы сабийлери, муниципал районладан бла шахар округладан, къырал учрежденияладан, кадет школладан   келген сабийле болгъандыла. Ала окъууда, олимпиадалада, искусствода, спортда, проектле эм жамауат ишде жетишимле болдургъандыла.

Казбек Коков алагъа этген алгъыш сёзюнде былай атылады:

- Бюгюн бери жыл санлары жащ болгъанларына да къарамай, быйылыгъы жылда жетишимле болдургъанла келгендиле. Биз сизни жетишимлеригиз бла ёхтемленебиз, сизге, сизни ёсдюрген аталарыгъыз, аналарыгъыз да къууанадыла. Россей Федерацияны Президентини башламчылыкълары бла жаш тёлюге болушургъа деп кёп иш этиледи. Кеслерин толусунлай айнытырча аламат онгла къураладыла, сиз ала бла иги хайырланасыз. 

Къабарты-Малкъарны жаш тёлюсю -ариу адетлени жюрютген, тийишли эм да абадан тёлюню тёрелерин жюрютгенледендиле.

Сизни  къарт аппаларыгъыз Уллу Ата журт урушну кезиуюнде дунияны фашистледен сакълагъандыла.  Жасыугъа, бюгюнлюкде бизни жууукъ адамларыбыз, аталарыгъыз, къарындашларыгъыз сиз  келир заманда  мамырлыкъда жашар ючюн къазауат этедиле.  Ала не заманда да Ата журтха сюймекликни юлгюсюн  кёргюзтгенлей турлукъдула.  Былайда олтургъанланы ичинде жигитлик этип, адамланы жашауларын сакълагъанла да бардыла.  Жаш тёлюбюз билимликлери бла республикабызны даражасын кётюредиле.  Мен жюрегими теренинден сизни бетигизден, битеу Къабарты-Малкъарны жаш тёлюсюн келе тургъан Жангы жыл бла алгъышлайма.  Мамыр жашауда жашагъыз, абадан тёлюню жетишимлеригиз бла къууандырыгъыз, битеу этген муратларыгъыз толсунла.   Биз сизге не жаны бла да болушлукъ этерикбиз, жангы школла, аламат спорт залла эм маданият юйле ишлерикбиз.  

Окъуучулагъа алгъышланы КъМР-ни Парламантини Председатели Татьяна Егорова, КъМР-ни Правительствосуну Председатели Мусукланы Алий,  министрле да айтхандыла.

 Республиканы Башчысы жаш тёлю бла кёп тюрлю темалагъа бардыргъан ушагъында кесини муратларыны эм жетишимлени юсюнден айтханды.

Тюбешиу «Арабеск» тепсеу къаууну эм Нальчикни биринчи номерли Искусстволаны сабий школуну келечилерини концерт программалары бла бардырылгъанды,- деп билдиреди КъМР-ни Бачысыны бла Правительствосуну пресс-службасы.