Энчи аскер операциягъа къатышханлагъа жоралап

Нальчикде «Война за соседним столиком» деген документли фильмни кёргюзтюую болгъанды. Кино «Атха бир атлам этмезге» волонтёр къымылдауну хайырындан кёргюзтюлюннгенди. Къырал концерт залгъа энчи аскер операциягъа къатышханла, ветеранла, аланы жууукълары, шуёхлары эм къаугъа баргъан жерледе жандауурлукъ иш бла кюрешген волонтёрла келген эдиле.

«Кинону алыргъа эсиме бир иги шуёхум Семён Ерёмин ёлгенден сора келеген эди. Ол белгили журналист эм огъурлу адам болгъанды. Аны юсюнден озгъан кезиуде айтхан къыйынды.

Бюгюн мында бушуу сынагъан энчи аскер операциягъа къатышханланы юйюрлерини келечилери да кёпдюле. Бек башы, жаш тёлюбюз шёндю бола тургъан къаугъа не ючюн бардырылгъанын ангыласала фильм муратына жетерикди»,-дегенди «Артха бир атлам да этмезге» жамауат биригиуню толтуруучу таматасы Байсыланы Темиржан.

«Бюгюнлюкде энчи аскер операцияны ал сатырында болгъанланы эм жанларын мамыр жашау ючюн бергенлени унутмазгъа керекди. Бизни жашларыбыз кюн сайын жигитлик болдурадыла, ала тюзлюк ючюн кюрешедиле, къарт аталары нацизмни ууатханларын да унутумай», - дегенди фильмге къараргъа келген КъМР-ни Правительствосуну Председательини орунбасары Залим Кашироков.

Документли фильмни хазырлагъанла анга къараргъа келгенлени энчи аскер операциягъа къатышхан жашларыбызны юсюнден керти хапарланы айтыргъа эм кёргюзтюрге кюрешгендиле. Ала аскерчилерибиз кюн сайын урушда къаллай сыныуланы ётгенлерин, бош адамланы къайгъыларын эм мамыр жашау ючюн кюреш къалай баргъанын туура этгендиле.

Белгилерчады, документли фильм Президент фондну маданият башламчылыкъларыны, КъМР-ни Башчысыны Казбек Коковну, ГКУ «КБР-Медиа» эм Энчи аскер операциягъа къатышхан волонтёрланы ассоциацияларыны болушлукълары бла алыннганды.