«Битеу жамауатны Ата журтубузну аллында жууаплылыкъ бирикдиргенди»

Экономикада, саулукъ сакълауда, билим бериуде, право низамны сакълауда, эл мюлкде, башха сфералада да жетишимлери ючюн республиканы 70-ден аслам инсаны къырал саугъала бла белгиленнгендиле.

Анга аталгъан къууанчлы жыйылыу бюгюн Правительствону юйюнде бардырылгъанды. Саугъаланы КъМР-ни Башчысы Казбек Коков бергенди. Тюбешиуге КъМР-ни Парламентини спикери Татьяна Егорова, Правительствону таматасы Мусукланы Алий, сенатор Улбашланы Мухарбий, Къырал Думаны депутаты Геккиланы Заур эм башхала къатышхандыла.  

Жыйылгъанланы алгъышлай, Казбек Валерьевич Жангы жылны байрамыны аллында ишчи жерлеринде бийик жетишимле болдургъанланы къырал саугъала бла белгилеу тёреге айланнганын чертгенди. Бу жол а Къабарты-Малкъарны саугъалары бла бирге Лука Крымский атлы майдал, «РФ-ни илмусуну сыйлы къуллукъчусу» ат, Россейни Президентини Сыйлы грамотасы бла Ыразылыгъы да берилгендиле.

- Быйыл бизге кёп сынаулагъа тюберге тюшгенди, алай биз биригип, кючлю болгъаныбызны энтта бир кере кёргюзтгенбиз. Республиканы аллында салыннган борчла барысы да толтурулгъандыла, сынаула бизни бютюнда къарыулу этгендиле.  Бу къыйын кезиуде битеу жамауатны Ата журтубузну аллында жууаплылыкъ бирикдиргенди. 2024 жылны ашыра, фронтда болгъан жигитлерибиз Ата журтубузну къоруулай, кишиликни юлгюсюн кёргюзтгенлери бла ёхтемленебиз, - дегенди алгъыш сёзюнде Казбек Валерьевич.

Регионну оноучусу мындан ары да энчи аскер операциягъа къатышханлагъа, аланы юйюрлерине болушлукъ этиллигин белгилегенди. Дагъыда экономикада жетишимлери, туризмни айнытыуну, миллет проектле социал сфераны жангыртыугъа этген себепликни, республиканы кеси файдаларын ёсдюрюуню юслеринден да айтханды.
2025 жылда Уллу Хорламны 80-жыллыгъын белгилеригибизни, ол артыкъда магъаналы жумуш болгъанын да айтханды. «Россейни Президентини оноуу бла келир жыл Ата журтну къоруулаучусуну жылы белгиленирикди. Биз аны бийик даражада толтурургъа къолдан келгенни этерикбиз», - дегенди.

Сёзюню ахырында Казбек Коков республиканы аллында салыннган борчланы жаланда жамауат биригип тамамлаяллыгъын чертгенди. «Къабарты-Малкъарны жашаууна, айныууна къайгъыргъыу, сайлагъан усталыкъгъа кертилик, алгъа итиниу хар бирибизни да борчубузду», - дегенди эмда жыйылгъанланы Жангы жылны байрамы бла алгъышлагъанды.

Ызы бла Казбек Коков саугъаланы бергенди.