«Насып хар кимни да кесинден башланады»

Кёп болмай Тырныауузда «Насып ичиндеди» деген философиялы ат бла кофейня ачылгъанды.Аны иеси Биттирланы Альбертни къызы Марина ётгюр, итиниулю жаш адамды. Ол кофейняны иш турмушун бла сыфатын бусагъатдагъы халгъа кёре къурагъаны себепли анда солургъа кофени сюймегенле окъуна келедиле. Маринаны кондитерлик ишге къалай келгенини, бизнесни башлаууну юсюнден да ушакъ этгенбиз. 

- Марина, сайлагъан окъууунга келишемиди бюгюннгю ишинг?

- Келишгеннге санайма. Къабарты-Малкъар Аграр академияны аграр комплекси бла байламлы бёлюмюнде окъуп, экономист усталыкъны алгъанма. Бюгюнлюкде ишимде хайырланнган продуктла, ун болсун, жумуртха болсун, аграр продуктла болгъанлары себепли  усталыгъым ишим бла байламлыды, дейме.

- Татлы ашарыкъла биширесе. Татлы уа къачан да адамны халын игилендирген, аны къанын байыкъдыргъан ашарыкъды. Аны эте билир ючюн адамны ич дуниясы ариу, халал, жууаш болургъа керек сунама. Алаймыды?

- Мен да кёп кере сагъышланнганма аны юсюнден. Огъурсуз адамны къолундан татлы ашарыкъ чыгъармы? Кесими юсюмден айтханда, жашауну жюрегим бла сюеме. Тёгерегимде жамауатны бек ариу кёреме, адамланы барын да къучакъларыгъым келеди. Мудахлыкъ жаланда жарсыу келтирген сунама. Ётюрюкге неда кёзбаугъа ышара уа билмейме.  Ашы татлы болур ючюн, аны жарашдыргъан уста ол ишни керти да сюерге керекди. 

Гитче заманымдан башлагъан эдим быллай затла бла кюрешип. Биринчи кере «Медовик» торт этип кёреме. Ол заманда уа, бусагъатдача онгла, амалла да жокъ эдиле. Миксерим болмай, чалдиш бла чагъып, газ печьде биширип кёрген эдим. Школда тюшден сора окъуй эдик. Анам а устаз болгъаны себепли эрттенден кете эди ишге. Ма ол келгинчи эталгъанымы этерге кюрешип, тапсыз болса уа, аны къоншуларым бла бирге букъдуруп ашаучу эдик. Анам аш отоугъа кирирге, анда затлагъа тиерге къоймаучу эди, кеси асыры тизгинлиден. Артда аз, аздан юйрене, 11 жылымда саулай арбазны сабийлерин кесим этген тортла бла сыйлаучу эдим.

 - Рецептлени уа къайдан ала эдинг?

- Хар кёрген, жаратхан затымы соруп, тилеп, алай таба эдим. Бирде уа, жетген къыз эдим, къонакъгъа барабыз да, бир жууукъ адамыбыз а бир ариу «Каллы» деген пирожнала этип, алып келеди. Аланы табакъгъа салгъанында, манга болмагъанча ариу кёрюннген эдиле. Аланы къуралыуун андан юйренип, биринчи кере этгенимде, ашагъанла бек жаратадыла. Ол кезиуде жангы келин болама да, къайын атам татлыны сюйгени ючюн ол да бек жаратады. Ма алай бла аз-аздан ол пирожналаны бла тортланы этип, тюкенледе сатдыра башлагъанма.

- Бюгюннге келтирген жолунгда эм къыйыны не эди?

- Тынч бир зат да болмайды. Жаш келин, ана болуп тургъанлай, биринчи атламларымы, бешикни жаныма салып, аягъым бла аны тебирете, къолларым бла уа сюйген ишими эте ётдюрген кюнлерим эсимдедиле.

Алай а, сау болсунла, баш ием, атам бла анам да не заманда да билеклик этгендиле. Хар башламымда къатымда болгъандыла. Биринчи гитче фатарны болжалгъа алып,алайда татлы ашланы студиясын ачхан эдим. Аны иши уллуду, ремонту, кереклери, ишчилери. Алай, тири атласанг, муратынга таукел жетесе. 

- Сора ол гитче студиядан башлагъанса?

- Хау. Жаланда бу ашарыкълагъа салгъан кереклерим эм иги качестволу болурларын излегенме. Аны себепли аладан ал заманда уллу файда кёрмесем да, ала атымы айтдыргъандыла. Ашны ким да татыулусун сюеди.

-Бу аламат кофейняны ачаргъа уа къалай тюшюннгенсе? Атына «Насып ичиндеди» деп атагъанса. Ол не магъанада айтылгъанды?

- Ол мени муратым эди. Эрттеден да ичимде жашагъан умутум. Алай бир заманда кишиден мюлк излемегенме. Биринчи ахчачыгъымы, эшиу эшип, онтёрт жылымда ишлеген эдим. Андан бери, кеси аллыма кюреше, кеси аягъы юсюмде турургъа итиннгенме. Бир ненча мекямны ичинде сайлай тургъанлай, былайда бу мекямны ишленирик хапарын эшитип, аны иесине тюберге келсем, алыкъа бир ташы да жеринден тепмеген эди. Архитекторла энди къарай тура эдиле. 

Хуржунумда жангыз бир сомум болмай, иеси бла мекямны биринчи къатын алыргъа келишеме. Ол, бир кесек апчыгъан да этип, сакъларгъа тюшеригин айтханында, ичимден келген бир ауаз арсарсыз сакъларыгъымы айтхан эди. Ма алай бла мекямны битдирир-битдирмез, биринчи къатын алып жарашдырыу ишлеге кёчген эдим. Хар адамны да насыбы аны ич дуниясына кёре болгъаны белгилиди, ариу кёзден къарасагъыз, кёлюгюзню жарыкъ туталсагъыз, насыплы боллукъсуз деген магъанада «Насып ичиндеди» деп атагъанма атына да.

- Ахчам болмай дейсе, неге ышаннганса да?

- Биринчи кюнден бери ишден тюшюрген файдамы тийишдирип, ишчи жерими кенгертирге, ашарыкъланы тюрлюлерин къошаргъа, жангы курслада окъуп, неге да юйреннгенме.

- Сора курслагъа да жюрюгенсе?

- Онлайн халда эм иги кондитерлени курсларын сатып алып, алада окъуп, билимиме шагъатлыкъ этген къагъытланы, сертификатланы да алгъанма. Грозный шахарда бардырылгъан бир белгили кондитерни мастер-классына юч кюн къатышханма. Биринчи атламларымы белгили кондитерлени оюмларына къарап, аланы сынамларына таяна этгенме. Кертисин айтсам, сюйген ишинге игирек юйреннген, болмагъанча зауукълукъду. 

- Мында, татлы ашарыкъладан сора да башха ашла да эте болурсуз?

- Кавказны миллетлерини ашларын этип башлагъанбыз. Сайлау уллуду. Келген къонакъларыбыз сюйген ашларын ашаргъа, танымагъан, жангы азыкъла бла да шагъырейленирге боллукъдула. Бизге келгенлени ыразы этер ючюн, хар ашыбызны татыулу этерге итинебиз. 

- Кеслерини энчи ишлерин башларгъа сюйюп, базыналмай тургъанла кёпдюле. Алагъа къаллай насийхат бераллыкъса?

- Белгилисича, къайсы жумуш да, уллу неда гитче болса да, жууаплылыкъны излейди. Жюрегигизни салсагъыз, этген ишигиз онгарыкъды, сизни алгъа атлатырыкъды. Башлагъан къыйын болса да, чырмауладан къоркъмазгъа, тюнгюлмезге керек сунама. Юйюрюмде хар жумушуму, аналыкъ, юй бийчелик борчларымы толтурургъа жетишгениме къатымдагъы адамларым, къаршыларым себеплик этедиле. Неден да башы уа – анамы ыразылыгъыды. Хар оюмуму бла муратымы биринчи анама айтыучума. Андан акъыл, оюм алып, кеси жолума таукел атланама. 

Ишинги сюйсенг, анга кёлюнг бла берилсенг, жетишимге жеталлыкъса. Бюгюнлюкде мен насыплыма. Баш ием Малкъондуланы Ахмат билеклик этгенлей, кеси кючюме ийнандыргъанлай турады, юч сабий ёсдюребиз. Акъ-Суудан эки жанындан да аппаларым бла аммаларым, жаннетли болсунла, бюгюн мени бла ёхтемленир эдиле деп, хар ишиме андан жууаплыракъ къарагъан сунама.