Шёндюгю мардалагъа келиширча

Кёп болмай Пятигорск шахарда «ТАСС Кавказ» регион  арада бардырылгъан пресс-конференцияда Къабарты-Малкъарны саулукъ сакълау министри Рустам Калибатов  «Саулукъ сакълау» миллет проектге кёре тамамланнган жумушла   бла шагъырей этгенди.

Ол  айтханыча,  беш жылны ичинде эки жыйырмадан артыкъ   багъыу учреждение жангыртылгъанды. Аланы 31-не  ол санда  19 поликлиникагъа бла  12 эл   амбулаториягъа тынгылы ремонт этилгенди.

Аны бла бирге Элбрус, Куба, Аушигер, Звёздный элледе биришер  амбулатория  жангыртылгъанды  эм  Октябрьскоеде  фельдшер-акушер пункт ишленнгенди. Нальчикде Головко атлы орамда Сабий поликлиникагъа  бла Дыгулыбгейде биринчи болушлукъ берген медицина учреждениягъа тынгылы къаралгъанды.

Сагъынылгъан миллет проектге кёре, терк болушлукъ берген службагъа   80 машина,  10  маммограф бла флюорограф алыннгандыла.  Энчи  транспортну арасында тау жерлеге жарарчалары да бардыла.

 Айтылгъан кезиуде  266 бийик технологиялы оборудование  алыннганды. Ол санда  цифралы маммографла, рентген комплексле, УЗИ- аппаратла, эндоскопия эм башхала.

Келир жыл «Тири эм узакъ ёмюрлю жашау» жангы миллет проектге кёре, биринчи медицина  болушлукъ берген 8 объект ишленирикди, дагъыда аллай бирине тынгылы ремонт этилликди. Аланы барысы да тийишли  оборудованияла бла  дажалчытыллыкъдыла