Аппасыны ызында

Аллай адамла боладыла, къаллай усталыкъ сайларгъа, къаллай жол бла барыргъа керекди дегенде, бир сайлау этип, аны тюрлендирмей тутханла. Штатда болмагъан корреспондентибиз Алийланы Мажир хапарын айтырыкъ Мызыланы Хусейни жашы Хаджимуса да аллайладан бириди.

Ол мал доктор боллугъуна школда окъугъанында да тюшюннген эди.  Аны сайлаууна себеплик аппасы Салих да этген болур, баям. Ол 30-чу жылланы ахырындан башлап, Ачы бла Думала эллени колхозуну мал доктору болуп тургъанды. Хаджимуса аппасыны юсюнден ыннасы Къалабекланы Мариямны хапарларындан, атасы Хусейни эсгериулеринден биледи.

Жигитим 1965 жылда Хушто-Сырт элде туугъанды. Ол школну бошар кезиуде элде жараулу усталыкъ керек эди да, Хаджимуса аппасыны юлгюсю бла барыргъа таукел болады. Алай бла ол 1983 жыл Прохладный шахарда Халкъ эл мюлк техникумну ветеринария бёлюмюне киреди. Аны 1986 жылда бошап, аскерде къуллукъ этерге кетеди. Анда жыл бла жарым заманны ичинде башенный кранда Сибирьде тогъуз къатлы юйле ишлеп тургъанды.

1988 жылда аскерден келгенлей, усталыгъына кёре мал доктор болуп Яникой элни совхозуна киреди.  Анда  юч ай ишлегенлей, аны Экинчи Чегем элни колхозуна кёчюредиле, юйюрюн да биргесине. Экинчи Чегемни колхозунда онбир жыл ишлейди. Звёздный посёлкада да юч жыл мал докторлукъ этип турады. Колхоз чачылгъандан сора Экинчи Чегемде мал доктор болуп тохташады.

Ол анда ишлеген къадарында эллилеринден уллу ыспасха тийишли болгъанды. Малны неден ауругъанын тохташдыргъан къыйын ишледен бириди. Анга кёре багъып, аны жанын сакълагъан да. Башха элледен таныш адамлары, жууукълары тилеселе да,  Хаджимуса бир заманда угъай демегенди.

Алай 2014 жылда мал докторлукъ ишин къоюп, къурулуш ишге кёчеди. Бу кюнледе Терс-Къолда тогъуз къатлы юйню къурулушун битдире турады. Ишден сора да,  Хаджимуса чыгъармачылыкъ иш бла да кюрешеди, чам хапарла, назмула да жазады. Жазгъан хапарлары «Минги-Тау» журналда, «Заман» газетде да басмалана тургъанды. Аны «Тарыкъгъан гюняхды» деген аты бла чам хапарланы жыйымдыкъ китабы да  дуния жарыгъын кёргенди.

Юй бийчеси Шауаланы Исмайылны къызы Лариса бла эки жаш бла бир къыз ёсдюредиле.  Уллу къазанда бишген чий къалмаз дегенлей, уллу юйюрде ёсгенди Хаджимуса кеси да ала сегиз сабий бар эдиле. Аны атасы Хусей, анасы Хабибат ауушханлы иги кесек заман болады. Алай аланы сёзлерин, иш кёллюлюклерин, адамлыкъларын ол дайым да сабийлерини эслерине салгъанлай турады.