Кёллендирген жууукълукъ

Бу кюнледе Нальчикде Маданият фондда Чувашиядан келген къонакъла бла тюбешиу болгъанды. Бизни республикада жашагъан миллетлени   маданият араларыны таматалары да анда эдиле. Бу тюбешиуню бардыргъан «Нарспи» чувашлыланы халкъла аралы маданият араларыны башчылары Алёна Чернова болгъанды. Жыйылгъанланы алларына чыгъып, маданият фондну таматасы Люаза Макоева, Чуваш миллет конгрессни президенти Валерий Климентьев, Чуваш Республиканы Кинематографистлерини  союзуну таматасы Олег Цыпленков тюрк миллетлени курултайларына къатышхан Къазакъланы Фатимагъа бла Нёгерланы Танзилягъа миллет накъышлары болгъан саугъала бергендиле.

Лариса Воронова къонакъланы жанындан, бизден а Марина Шериева жыр айтып  къууандыргъандыла.

Лариса айтхан жырладан бирини макъамы малкъар жырладан бирине бек ушагъанын ол кюн анда болгъан таулула бирден сезгенбиз. Неда музыка инструментле хазырлагъан уста  Николай Фумиряков сыбызгъыланы къаллай битимлени къаураларындан этгенин айтып, сокъгъан да этгенди.  Сыбызгъы этиуде да чувашлыланы, малкъарлыланы да ушагъан жерлери барды. Поэт Раиса Сарби, назмуларын айтып, китапларын  фондха саугъагъа бергенди. «Балкария» фольклор-этнография къырал ансамбльден Шауаланы Рамазанны  бла Бачиланы Денизаны тепсегенлерин а чувашлы къонакъла бютюн бек жаратхандыла. Ала да, миллет кийимлери бла чыгъып, кеслерини   тепсеулерин кёргюзтгендиле. 

Ызы бла   къонакъла Черек районда болгъандыла, миллет  ашарыкъларыбызны татыуун а Огъары Малкъарда билгендиле.