Жарыкъ да, сейирлик да сагъатла

Кёп болмай Москваны  ВДНХ-сында Россейде сабий биригиулени бек уллу фестивальлары ётгенди. Анга  Россейни 89 регионундан келечиле  къатышхандыла. 

Бу байрам Сабийлени эмда жаш тёлюню «Биринчилени атламлары» битеуроссей биригиулерини, Жаш тёлюню ишлери жаны бла федерал агентствону эмда Россей Федерацияны Билим бериу  министерствосуну себепликлери бла къуралгъанды. Ол эки кюнню баргъанды эмда  уллу, гитче да зауукълукъ табарча къуралгъанды. Анга келгенле  ачыкъ кёкню тюбюнде тюрлю-тюрлю сахна оюнлагъа,  циркге, гапчилеге, мастер-класслагъа къатышхандыла, сейир къадарлары болгъан адамла бла тюбешгендиле, белгили артистлени, чыгъармачы къауумланы  концертлерине къарагъандыла. Эсде къалырча бек сейирлик тюбешиу а къыралны Президенти Владимир Путин бла болгъанды.

Къабарты-Малкъарда фестивальгъа «Биринчилени атламлары» биригиуню регион бёлюмюню айырма келечилери баргъандыла – битеу да беш адам. Аланы араларында  Бызынгыдан Холаланы Салихни къызы Сафият да болгъанды. Ол  школда  онунчу классны  эм иги окъуучуларындан  бириди, жамауат жашаугъа тири къатышады. 

Сабийлени биргелерине  устаз Залина Сижажева да баргъанды. Ол айтханнга кёре, республикадан баргъан къызчыкъла бла жашчыкъла   фестивальдан къууанып къайтхандыла, анда  болгъан  кёп ишлеге къатышхандыла, тириликлерин да кёргюзтгендиле.