"Аш орунну жарасы осал ниетлиликден да чыгъаргъа болады"

 Аш орунлары ауругъанла бек кёпдюле. Гастрит, язва, башха къыйынлыкъла…Неден чыгъады палах? Аны юсюнден Нальчик шахарда Ара поликлиниканы гастроэнтерологу  Жашууланы Алим бла ушакъ этгенбиз.

-Аш орунну жарасын къалай сау этерге боллукъду алимле тапхан амалла бла?

- Ол амалладан бек жангысы – аш орунларында эм сокъур чегилеринде жаралары болгъанла не ашагъанлары бла байламлыды. Алгъын аш орунларында жаралары болгъанлагъа кёп тюрлю ашланы ашатмагъыз, диета бла жашасынла дей эдиле. Энди уа аш орунну къыйнарыкъ затладан, сау-саламат адамлагъа жарашмагъан турмаладан, маринадладан, кючлю  соусладан къалгъан  ашланы хайырланыргъа боллукъду, дейдиле.

Багъыуну энчи алып айтханда уа – аны тийишли даражада бардырыргъа бирча кёз къарам жокъду, алгъын да болмагъанды.

-Официальный эм халкъ медицина бир бирден башха-башха амалланы хайырланнгандыла, бири бирин сёгюп тургъандыла. Сора къалай эм не этейик да?  Даулашны  къыйматы недеди?

-Алимле, медицина эм физиология бёлюмде 

HeIicoabcteр РуIорi бактерияны табып, Нобельни саугъасын алгъандан сора, аш орунну жарасы ючюн жууаплылыкъны ол микробну «боюнуна»  салгъан эдиле. Ауруу тёлюден тёлюге ёте келген  эсе да, аны да юйюрню ичинде биринден бирине жугъуп келеди, деп ангылатыргъа кюрешгендиле.  Биринден бирине жугъуу асламысында сабийни къагъанакъ заманында болады, гастритден неда аш оруну язвадан ауругъан ана, жерге тюшген эмизикни ауузуна сугъуп, тазалап, аны сабийни ауузуна сукъса. Озгъан ёмюрде, хеликобактерияны ачыкълагъынчы дери да, гастроэнтерологла, болумну иги ангылаялмай эселе да: «Аш оруну язвадан ауругъан адамны  уппа этмегиз», - деп бошдан айтмагъандыла. Бактерияла адамны аш  орунундан кетмей турадыла ахыргъа дери – адамны чархы уа аланы хорлаялмайды.

 Хеликобактер  бактерияла хар адамны чархында бардыла, язвадан эм гастритден а адамла барысы да аурумайдыла. Ол адамны чархына къалай бла тюшгенин да ахырына дери ачыкълаялмагъандыла. Энди кёпле айта башлагъандыла хеликобактерияла дуния жарыгъына бизни бла бирге жаратыладыла, деп. Язва таза болмагъан адам уппа этсе жугъарыкъды. Бактерияла адамны аш орунуна  къутулсала, адам антибиотик дарманланы ичмесе, аны битеу жашауунда окъуна биргесине боллукъдула

- Багъылыуну юсюнден айтсагъыз эди?

- Айтылгъан бактерияланы хорларыкъ дарманла кёп тюйюлдюле. Официальный халда багъыу – жараны башын плёнка бла жабарыкъ дарманланы ичиудю. Ол къатны тюбюнде жараланы 75 проценти тырмыланып, сау боладыла. Ауруу къыйыннга кетсе, дарманланы тюрлю-тюрлюлерин бирге ичерге керекди, ол да язваны сау этмейди. Фитотерапияны болушлугъу бла уа 20-шар кюнле бла эки курсну ичинде язваны да сау этерге, хеликобактерияланы да къурутургъа боллукъду.

Фитотерапия бусагъатда официальный медицинаны кесегиди. Аш орунну жарасын дарманла бла болмаса, башха амалла бла бир киши да сау эталлыкъ тюйюлдю, халкъ медицинаны амаллары да жараны ачыгъанын бир кесекге шошайтады ансы, андан ары уа болушалмайды. Ол ауруудан сау болур ючюн, адамгъа жаланда стационарда багъаргъа керекди.

Дарманланы ичиу аш орунну ачыкъ жарасын къотурландырады эм  сау этеди. Болсада бу аурууну жаратхан сылтаула бар къадарда, ол  кесин эсгерте-эсгерте турлукъду.

-Психологланы оюмлары уа къаллайладыла аш  орунну ачыкъ жарасына багъыуну юсюнден?

- Бола келгенича, аш орунлары ачыкъ жаралы болгъанла – къаугъалыладыла, тёзюмсюзледиле. Алай эсе, адамны психикалы проблемасын кетермей жаланда дарманла бла багъыу  хайыр берлик тюйюлдю.

Адам  бир затха ачыуланса, жюреги къыйналса – жарасы ачылады. Башхалагъа кир ниети да – жюкдю! Ол жюкню аш орун сезеди эм сёгюледи. Ниетигизни тазалагъыз, жашаугъа къууаныгъыз, сора ол кезиуде дарманла да болушурукъдула.