Сабийле ёсдюргенлеге – кёбейтилген тёлеуле

Россейни Социал фондуну Къабарты-Малкарда бёлюмю 10 676 абаданнга, аланы къарауларында сабийле болгъанлары ючюн  пенсияларын кёбейтип тёлейди.

Болушлукъну бу тюрлюсю акъылбалыкъ болмагъан, 23 жыллары толмагъан, очный халда окъугъан неда гитчеликден сакъат сабийлери болгъан пенсиячылагъа этиледи. Кёбейтилген пенсияны 18 жыллары толмагъан къарындашларына, эгечлерине бла туудукъларына, ала очный халда окъуй эселе, 23 жыллары толгъунчу  къарагъанла да алыргъа эркиндиле, аланы ишлерге онглары болгъан ата-аналары жокъ эселе. Кёбейтилген пенсия аланы уруннганларына бла къалгъанларына къарамай бериледи, быйыл бир сабий ючюн аны ёлчеми 2 711,63 сомду, эки сабий ючюн – 5 423,25 сом, ючеулен ючюн а – 8 134,88 сом. Къошакъ тёлеу атагъа бла анагъа, ала  бар эселе, экисине да берилликди.

Сабий заочный, дистанциялы  неда ингирги халда окъуп тебиресе, окъуудан къысталса, ишге кирсе, аны ючюн пенсия кёбейтиллик тюйюлдю. Аллай болумланы юслеринден фондну клиент службасына билдирирге тийишлиди. Студент академия отпускга бара эсе, тёлеу тыйылмайды.

Кёбейтилген пенсияны алыр ючюн абаданла фондну бёлюмюне, МФЦ-гъа барып неда къырал жумушланы порталында аны юсюнден заявление жазаргъа керекдиле. Аланы къарауларында 2024 жылны 1 январындан сора туугъан бала бар эсе, заявление жазарлары изленмейди.

Бютюн толу хапар билирге сюйген адам  фондну регионда бёлюмюню контакт-арасына ишчи кюнледе сёлеширге боллукъду. Аны номери: 8-800-200-06-70. Аны бла сёлешиу хакъсызды.