Къыш солууну сюйгенлеге – тынчлыкълы онгла

Минги тауда 55-чи тау лыжалада учуу кезиу уллу байрам бла башланнганды.

Тёреде бола келгенича, тау лыжалада учуу кезиу ноябрьны ахырында башланып, майгъа, бирде уа июньнга дери барады. Алай бла къыш солууну сайлагъанланы муратларын толтурургъа сегиз айлары барды. Азауда уа къонакълагъа буз скульптура тюбейди, ол да аллай бир заманны эримей турлукъду. Минги тауну къарлы этеклери ариулукълары бла кёз байлайдыла, спортну къыш тюрлюлерин сюйгенле уа биринчи учууларына хазырланадыла. 55-чи учуу кезиуге аталгъан байрам а Азау талада бардырылгъанды. Артистлени жырлары, тепсеулери, эришиулери – ала барысы да байрамгъа энчи къууат бередиле, туристлени бир къаууму тепсейдиле, башхалары уа дауурбаслада ойнаргъа юйренедиле. Эришиуледе хорлагъанлагъа «Минги тауну гёжефи» деген ат берилликди. Курортну къонакъларыны барысына да – абаданлагъа  эм гитчечиклеге да, кёллерине жетерча эришиуле табыладыла. 

Жыл сайын къышда Минги тауда лыжачыла, сноубордчула, райдерле бла альпинистле жыйыладыла. Алагъа къыйынлыкъларына кёре жети тюрлю лыжа жол хазырланнганды, аланы узунлукълары 20 километрден асламды. Быйыл жалгъан къар берген жангы система ишлеп башлагъанды, аны хайырындан 3000-2350 метр бийикликде да учаргъа жарарыкъды. Солугъанлагъа таплыкъгъа билдириуле офис да барды, анда курортну юсюнден кёбюрек билирге, электрон терминалла бла ски-пассла алыргъа, керекли жумушланы къауумун сайларгъа боллукъду. Былтырдан башлаб а канат жоллагъа барыр ючюн банк картала да хайырланыладыла.